3 апрелнинг эътиборга молик хабарлари — «Дарё» дайжестида.
Сурхондарё вилояти ҳокими Баҳодир Пўлатов воҳа аҳли билан хайрлашди.
«Сизларга мустаҳкам соғлиқ, оилавий бахт, тинчлик ва хотиржамлик тилайман. Сурхондарё янада гуллаб-яшнайверсин!», дейилади Баҳодир Пўлатов номидан қолдирилган хайрлашув матнида.
Эслатиб ўтамиз, олдинроқ Бош вазир Абдулла Арипов бошчилигида 1 апрель куни ўтказилган йиғилишда Сурхондарё вилояти ҳокими Баҳодир Пўлатов лавозимидан озод этилгани ҳақида хабар берилганди.
***
Саудия Арабистонида қор ёғди.
31 март куни Саудия Арабистонининг шимоли-ғарбий қисмида ҳаво ҳарорати пасайиб кетди ва тоғли ҳудудларда қор ёғди.
Жабал Лауз тоғида якшанба куни кундузи қор ёға бошлаган ва кечга бориб Иордания билан чегарадош ҳудуд оппоқ қор билан қопланган.
***
Тошкентнинг 3 та йирик бозорида шошилинч чақирув комплекслари ўрнатилди.
Тошкентнинг «Чилонзор буюм савдо», «Дўстлик савдо мажмуаси» (Ипподром) бозорлари ва «Тошкент савдо маркази»да (ГУМ) тажриба тариқасида шошилинч чақирув комплекслари ўрнатилди.
Тажриба якунлари ўрганиб чиқилганидан сўнг бундай комплекслар шаҳарнинг бошқа жамоат жойларида ҳам ўрнатилади.
***
Юнусобод тумани собиқ ҳокимининг иши судда кўрилмоқда.
Тошкент шаҳрининг Юнусобод тумани собиқ ҳокими Бахтиёр Абдусаматов Жиноят кодексининг 205-моддаси 1-қисми, 2-қисми «а» банди («Ҳокимият ёки мансаб ваколатини суиистеъмол қилиш»), 210-моддаси 2-қисми «а» банди, «б» банди ва 3-қисм «а» банди («Пора олиш») билан айбланган ва бу ҳолат судда кўрилмоқда.
Эслатиб ўтамиз, Бахтиёр Абдусаматов 2018 йил 7 сентябрь куни ишхонасида катта миқдорда пора олишда гумон қилиниб ушланганди.
***
Ер аҳолисининг сони 7,7 миллиардга етди.
БМТ Бош котибининг ҳисоботига кўра, 2019 йилда Ер аҳолиси 7,7 миллиард кишини ташкил қилади ва 2050 йилга бориб 9,7 миллиард кишига етади.
Нью-Йоркдаги БМТ марказида бошланган аҳолишунослик бўйича комиссияга тақдим этилган ҳисоботга кўра, аҳоли сонининг ўсиши, қариш, камайиб бораётган туғилиш ва тезкор урбанизация билан кузатилади.
Изоҳ (0)