Тошкентда байкерлар 7 апрель куни мотомавсумни бошлаб беради

«Тошкент бўйлаб 21 километр» хайрия акцияси Ўзбекистонда мототуристик мавсумни очиб беради. У бир неча тадбирларни ўз ичига олган, дея хабар беради пойтахт ҳокимлиги матбуот хизмати.

Тадбир ташкилотчилари томонидан саёҳатда иштирок этувчи биринчи гуруҳ иштирокчиларининг рўйхати шакллантирилган. Россия ва Марказий Осиё мамлакатларининг малакали мотоциклчилари 7 апрель куни соат 11.00да «Пахтакор» метро бекати ёнида тўпланади ва соат 12.00да шаҳар бўйлаб 21 километр масофада кўргазмали намойишга чиқади.

Соат 11.00да «Анҳор-Локомотив» маданият ва истироҳат боғида ҳам мототуристик мавсум очилишида иштирок этишни хоҳлаган мото ишқибозларини рўйхатга олиш бошланади ва иккинчи гуруҳ шакллантирилади. Биринчи гуруҳ боққа етиб келгач, иккала гуруҳ иштирокида боғ бўйлаб мотосаёҳат уюштирилади.

Соат 12.30дан 16.00га қадар «Тошкент бўйлаб 21 километр» хайрия акцияси доирасида турли маданий тадбирлар ўтказилади.

Жумладан, «Энг оригинал мотоцикл», «Энг чиройли мото», «Қўлда йиғилган энг яхши мото» каби номинацияларда танлов ўтказилади ва ғолиблар танлов ташкилотчилари томонидан тақдирланади.