Қозоғистон Соғлиқни сақлаш вазири Елжан Биртанов Ўзбекистонга инсулинни ноқонуний сотган шахсларга нисбатан ўтказилган тергов иши ҳақида ахборот берди. Бу ҳақда Спутник маълум қилди.
Жорий йил бошида ОАВлар Қозоғистон дорихоналарида бепул тарқатиш учун мўлжалланган инсулин Ўзбекистонга олиб кетилаётгани ҳақида хабар қилганди. Бу маълумотлар ошкор бўлгандан сўнг Қозоғистон Соғлиқни сақлаш ва Ички ишлар вазирликлари мазкур ҳолат бўйича терговни бошланганди.
«Ҳозир олиб чиқилган инсулинларнинг асосий манбаси аниқланди, тергов ҳаракатлари олиб борилмоқда. Бизда мавжуд бўлган маълумотларга кўра, ҳуқуқ-тартибот органлари текширув ўтказмоқда», — деди вазир.
Соғлиқни сақлаш вазири сўзларига кўра, бир йил олдин вазирлик республика бўйлаб бепул дори воситаларининг текширувини ўтказган. Дори воситаларининг ноқонуний савдоси ҳолатлари бўйича маълумотлар ҳуқуқ-тартибот органларига тақдим этилган.
«Ноқонуний ҳолатлар ҳуқуқ-тартибот органлари ва Бош прокуратура билан ҳамкорликда аниқланди. Ҳозирги вақтда 28 та жиноят иши қўзғатилди», — деб қўшимча қилди Биртанов.
Изоҳ (0)