Тошкент шаҳрида тўхтаб туриш қоидаларини бузган ҳайдовчиларга нисбатан онлайн чоралар кўрилиши ҳақидаги дастурий таъминот синов тариқасида йўлга қўйилди. Бу ҳақда Тошкент шаҳар ИИББ бошлиғининг жамоат тартибини сақлаш бўйича ўринбосари полковник Азизхон Умархонов журналистлар билан ўтган брифингда маълум қилди.
Келгусида ҳайдовчилар «Йўл ҳаракати қоидалари»нинг 3.27 (Тўхташ тақиқланган) йўл белгиси таъсири остидаги ҳудудда автомашинани қолдирса, уларнинг яшаш манзилига жарима солиш ҳақидаги қарор почта орқали юборилади.
Азизхон Умархоновнинг тушунтиришича, «Тўхташ тақиқланган» йўл белгиси таъсири остида тўхтаб туришга 10 дақиқагача рухсат берилади. Яъни белгиланган йўналиш бўйича автопатруль бир маротаба ўтади. Ўша йўналишга ўн дақиқадан кейин қайтиб келади. Агар автомашина 10 дақиқа ичида ҳам аввалги жойида тўхтаб турган бўлса, қоидабузарлик қайд эдилади. Ҳайдовчининг яшаш манзилига биринчи қайд этилган ва иккинчи бор қайд этилган расм ва бошқа маълумотлар юборилади. Бу ўн дақиқалик «имконият» дорихона, бозор ёки дўконларга кириб-чиқиш учун ва бошқа зарур ҳолларда фуқароларга қулайлик яратиш мақсадида берилмоқда.
Изоҳ (0)