Андижон вилояти ҳокими Шуҳратбек Абдураҳмонов Президент ташаббуси билан республика бўйлаб қизғин давом этаётган #bookchellange мактабларга китоб совға қилиш анъанасини айни пайтда Германияда хизмат сафарида бўлганлиги сабабли онлайн-мулоқот орқали давом эттирди. Бу ҳақда «Дарё» мухбири хабар бермоқда.
Пахтаобод туманидаги 4-умумтаълим мактабида ўтказилган мулоқотда туманнинг 4-, 23- ва ўзи таҳсил олган 31-умумтаълим мактабларининг ўқитувчи ва ўқувчилари иштирок этди.
Мулоқотда «Давлатимиз раҳбари илгари сурган ташаббусга ўз вақтида ҳисса қўшишни истадим ва ўзимнинг кутубхонамдаги 200 дан ортиқ китобни сизларга юбордим. Ўйлайманки, ушбу китобларни ўқиб, ўз билим ва кўникмаларингизни янада мустаҳкамлаб, мамлакатимиз тараққиётига муносиб хизмат қиладиган шахслар бўлиб етишасиз», – деди вилоят раҳбари Шуҳрат Абдураҳмонов.
Юборилган китобларни вилоят ҳокимлиги котибияти мудири ўз эгаларига топширди.
Ҳуқуқшунос Хушнудбек Худойбердиев «Раҳбарларнинг севимли китоби» лойиҳаси доирасида вазирлар, ҳокимлар ва ҳукуматнинг бошқа вакилларининг энг севимли китоблари рўйхатини тақдим қилганди. Андижон вилояти ҳокими Шуҳрат Абдураҳмоновнинг севиб ўқийдиган китоблари рўйхатига Ли Куан Юнинг «Учинчи дунё мамлакатларидан - биринчига. Сингапур тарихи (1965-2000)», Заҳириддин Муҳаммад Бобурнинг «Бобурнома», Амир Темурнинг «Темур тузуклари» киради. Андижон ҳокими, шунингдек, Муҳаммад Юсуф шеъриятини ҳам севиб ўқишини маълум қилган.
Эслатиб ўтамиз, 19 март куни ўтказилган ёшлар маънавиятини ошириш, уларнинг бўш вақтини ташкил этишда кўмак бериш, ёшлар орасида китоб ўқишни тарғиб қилишга бағишланган видеоселектор йиғилишида Ўзбекистон Президенти Шавкат Мирзиёев «Ҳар бир раҳбар шахсий кутубхонасидан ўзи таълим олган мактаб кутубхонасига китоблар совға қилса, бу яхши ташаббус бўлиб, китобхонликни ривожлантириш билан фарзандларимиз тарбиясига ижобий таъсир кўрсатади», — дея таъкидлаганди.
Изоҳ (0)