Халқ таълими вазирлиги «Миллий тикланиш» демократик партияси марказий кенгаши раиси Сарвар Отамуродовнинг Сирдарё, Самарқанд, Фарғона, Тошкент вилоятларидаги тарбияси оғир болалар учун мўлжалланган тўртта махсус мактабдаги вазият юзасидан билдирган танқидий фикрларига раддия билдирди.
Мавзуга доир: Сарвар Отамуродов: «Хулқи оғир болалар учун мўлжалланган мактабларда ҳомиладор қизлар бор»
Мазкур мактаб-интернатларига ижтимоий хавфли қилмишлар содир этган, лекин жиноий жавобгарликка тортиш мумкин бўлган ёшга тўлмаган ёхуд руҳий касаллик билан боғлиқ бўлмаган ҳолда ривожланишда ўз ёшига нисбатан анча орқада қолиши оқибатида содир этган қилмишининг моҳиятини тўлиқ англаб етишга қодир бўлмаган, якка тартибдаги профилактика иши олиб борилаётганлигига қарамай, ҳуқуқбузарликлар ёки бошқа ғайриижтимоий хатти-ҳаракатлар содир қилишни давом эттираётган 11—14 ёшли вояга етмаганлар маълум бир муддатга (6 ойдан 3 йилгача, то ахлоқан тузалгунларига қадар) жойлаштирилади. Тарбияланувчилар ахлоқан тузалганларидан сўнг, умумтаълим мактабларида таълим олишни давом эттиради.
Халқ таълими тизимига қарашли Самарқанд шаҳридаги 64-сонли ўғил болалар учун ихтисослаштирилган мактаб-интернатида жами 113 нафар тарбияланувчига 43 нафар, Чиноз туманидаги 5-сонли қиз болалар учун ихтисослаштирилган мактаб-интернатида жами 40 нафар вояга етмаган болаларга 20 нафар педагог таълим-тарбия беради.
«Маълумотларда келтирилган жумлалар тўғрисида тўхталиб ўтадиган бўлсак, аввало ‘… ҳомиладор ёш қизлар бор, у шароитларда одам яшай олмайди’ қабилидаги гаплар келтириб ўтилган. Шуни алоҳида таъкидлаш керакки, вазирлик тасарруфидаги юқорида келтириб ўтилган таълим муассасасида 11—14 ёш қизлар тарбияланади. Тарбияланувчи қизлар орасида эса бу каби ҳолатлар қайд этилмаган», — дейилади баёнотда.
Вазирликнинг эътирозига кўра, халқ таълими тизимидаги ихтисослаштирилган мактаб-интернатларига ўқувчилар суд ажрими ва халқ таълими вазирлигининг йўлланмасига асосан чуқур тиббий кўрикдан ўтказилган ҳолда қабул қилинади. Тарбияланувчиларнинг ҳомиладорлиги ҳақида тарқатилган нотўғри маълумотлар эса 11—14 ёшли қизларни маънавий-ахлоқий жиҳатдан таҳқирлашга сабаб бўлмоқда.
Сарвар Отамуродов махсус мактаблардаги аҳволни «криминал бўлиб ётибди, давлат бюджетидан ажратилган пуллар талон-тарож. Ўзи шундоқ ҳам хулқи ёмон болалар орасида муҳит жуда ачинарли» деганди.
Вазирликнинг қайд этишича, мазкур ихтисослаштирилган мактаб-интернатлари 2018 ва 2019 йиллар давомида бир неча бор Бош прокуратура, турли ташкилот ва идоралар ҳамда БМТнинг Болалар жамғармаси (UNICEF)нинг Ўзбекистондаги ваколатхонаси ходимлари томонидан ўрганилган. Ўрганиш давомида таълим муассасаси фаолияти ва тарбияланувчилар томонидан айтиб ўтилган салбий ҳолатлар аниқланмаган.
«Миллий тикланиш» партияси етакчиси Сарвар Отамуродов ўз чиқишида нафақат Халқ таълими вазирлигини, балки Маданият вазирлиги ва Ёшлар Иттифоқини ҳам танқид қилганди. Отамуродовнинг сўзларига жавобан, Маданият вазирлиги вакиллари «тош отишнинг турли йўллари борлигини биз ҳам биламиз» қабилида жавоб қайтарган эди.