Бугун, 18 март куни Ўзбекистон Республикаси Президенти ҳузуридаги Давлат бошқаруви академияси анжуманлар залида Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги ташаббуси билан «Кўнгил кўзи» лойиҳаси тақдимотига бағишланган давра суҳбати бўлиб ўтди. Бу ҳақда Ахборот ва оммавий коммуникациялар агентлиги хабар берди.
Тадбирнинг мақсади – кўзи ожиз ва заиф кўрувчиларни ўқув, бадиий, илмий ва бошқа адабиётлар билан таъминлаш билан боғлиқ масалаларни ҳал этишда давлат органлари, жамоат бирлашмалари ҳамда халқаро тузилмаларнинг саъй-ҳаракатларини бирлаштириш.
Давра суҳбатида жами 100 га яқин киши қатнашган. Жумладан, дипломатик корпус, Ўзбекистонда аккредитациядан ўтган халқаро ташкилотлар, хорижий мамлакатларнинг Ўзбекистондаги элчихоналари, вазирликлар, идоралар, кўришда муаммоси бўлган инсонлар билан ишлашга ихтисослашган давлат ва жамоатчилик ташкилотлари вакиллари, кўзи ожизлар махсус мактаб-интернати ўқувчилари, журналистлар иштирок этган.
«Юртимизда 12 та махсус-интернатда 3 минг нафардан ортиқ кўзи ожиз ва заиф кўрувчилар таҳсил олади. Улар учун Агентлик тизимидаги ягона нашриётда зарур дарслик ва бошқа адабиётлар нашр этиб келинмоқда», — дейди Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги директори вазифасини бажарувчи Комилжон Алламжонов.
2019 йил 2 февралда Ўзбекистон Республикаси Президентининг «Кўнгил кўзи» лойиҳасини амалга ошириш бўйича «Йўл харитаси»нинг тасдиқланган.
Лойиҳанинг асосий вазифалари сирасига:
– кўриш қобилияти билан боғлиқ муаммолари бор инсонларни қўллаб-қувватлаш, уларни ўқув, бадиий, илмий ва бошқа адабиётлар билан таъминлаш;
– «Кўзи ожизлар босмахонаси» корхонасининг моддий-техник ҳолатини яхшилаш, ходимларини ижтимоий қўллаб-қувватлаш, самарали фаолият юритишлари учун уларга зарур шарт-шароитларни яратиш киради.
Яқин келажакда Агентлик ушбу лойиҳа доирасида нафақат барча махсус мактаб-интернатларни зарур ўқув китоблари билан таъминлашни, балки ўқув материалларни тушунарли ва осон кўринишда етказиб бера оладиган «Ўргатувчи адабиёт», А. Навоий, А. Қодирий, Чўлпон, Жомий каби адибларнинг машҳур асарларини ўзида жамлаган «Ўзбек адабиёти дурдоналари» туркум аудиокитобларини нашр этишни йўлга қўйишни режалаштирган.
Шунингдек, истиқболда кўриш борасида турли имкониятларга эга инсонлар ҳаётидан қизиқарли лавҳаларни ўз ичига олган «Ўзгача инсонлар» тўпламини чиқариш ҳамда кўзи ожиз ва заиф кўрувчилар учун музейларга экскурсияларни ташкил этиш методикасини ҳаётга тадбиқ этиш, кўриш қобилиятида муаммолари бор инсонлар учун сенсорли (тактил) жўғрофия хариталарини чиқариш кўзда тутилган.
Наврўз байрами арафасида Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги томонидан махсус мактаб-интернат ўқувчиларига совғалар топширилган. Болаларга аудио-эртакларни ўзида жамлаган колонкалар ҳамда Брайл шрифтида чоп этилган ўзбек эртаклари тўплами тақдим этилган.
Изоҳ (0)