АҚШнинг Жаҳон Банки фонди Қарши давлат университетида талабалар билимини баҳолашда шаффофликни таъминлаш, мустақил таълимнинг аҳамиятини кучайтириш, вилоятдаги ишлаб чиқариш корхоналари ва олий таълим муассасалари ўртасидаги алоқаларни мустаҳкамлаш орқали ўқитиш сифатини яхшилаш учун 2019–2020 йилларда умумий қиймати 2 миллард сўм маблағ сарфлайди. Бу ҳақда «Дарё»га университет матбуот хизмати раҳбари Ойбек Юсупов хабар бермоқда.
Ойбек Юсуповнинг айтишича, бу ҳақда Олий ва ўрта махсус таълим вазирининг 2019 йил 20 февралдаги Халқаро Ривожлантириш Ассоциацияси иштирокидаги «Олий таълим муассасаларининг моддий-техник базасини мустаҳкамлаш» лойиҳаси доирасидаги Академик инновациялар фондининг грант лойиҳаларини молиялаштириш тўғрисидаги буйруғида таъкидланган. Шунга кўра, Қарши давлат университети профессор-ўқитувчилари томонидан тақдим этилган «Ўзбекистон олий таълим муассасаларида таълим жараёнини ташкил этишда янги технологиялар» ҳамда «Қарши давлат университети ва Қашқадарё вилоятидаги ишлаб чиқариш корхоналари ўртасида талабаларни ўқитиш сифатини яхшилашга қаратилган муносабатларни мустаҳкамалаш» деб номланган грант лойиҳалари АҚШнинг Жаҳон Банки фонди томонидан қўллаб-қувватланган.
Университет томонидан тақдим этилган лойиҳаларда олий таълим муассасалари профессор-ўқитувчиларининг фаолиятини баҳолашнинг такомиллашган механизмини ишлаб чиқиш, замонавий ишлаб чиқариш технологиялари ва ускуналаридан профессор-ўқитувчиларнинг малакасини ошириш ҳам назарда тутилган. Талабаларнинг магистрлик диссертациялари ва битирув малакавий ишларини ишлаб чиқариш корхоналаридаги муаммоли ҳолатлар билан боғлаб, корхоналарда ишлаб чиқариш талабларини ҳисобга олган ҳолда ўқув дастурларини такомиллаштириш кўзда тутилган.
Шуни алоҳида таъкидлаш лозимки, мазкур 2 миллиард сўм маблағ эвазига университетга хориждан замонавий техник ускуналар, технологиялар, жиҳозлар ва дастурий таъминотлар олиб келиниши ҳам режалаштирилган.
Изоҳ (0)