Ўзбекистон январь—февраль ойларида 1,2 млрд долларлик олтин сотди

2019 йил январь — февраль ойларида экспорт ҳажми 3,03 миллиард долларга (ўсиш суръати 20,4%) тенг бўлди. Бу ҳақда Spot хабар берди.

Экспорт таркибида товарлар 86,6 фоиз улушга эга бўлиб, булар асосан энергия манбалари ва нефть маҳсулотлари (16,0%), тўқимачилик ва тўқимачилик буюмлари (7,5%), озиқ-овқат маҳсулотлари (4,2%), шунингдек, қора металлар ва ундан тайёрланган буюмлар (1,4%), рангли металлар ва ундан тайёрланган буюмлар (4,6%) гуруҳлари ҳиссасига тўғри келмоқда.

Ушбу уч миллиард долларнинг ярмидан камроғи олтин ҳиссасига тўғри келди - 1,2 миллиард доллар. Олтинни ҳисобга олмаганда, экспорт ҳажми 45,3 фоизга ошиб, 1,8 миллиард долларни ташкил этди.

Агар 2018 йил билан солиштириладиган бўлса, экспорт тузилмасида сезиларли ўзгаришлар юз бермаган, аммо 2019 йил январь—февраль ойларида олтиндан ташқари барча товар ва хизматларнинг экспорт улуши ошган.

2018 йилда Ўзбекистон 2,9 миллиард долларлик олтин сотди. У экспортдаги энг асосий товарлардан бири бўлиб қолмоқда. Масалан, 1,1 миллиард долларлик қора ва рангли металлар, 1,6 миллиард долларлик тўқимачилик маҳсулотлари, 1 миллиард долларлик озиқ-овқат маҳсулотлари сотилди.

2018 йил кузида Ўзбекистон олтин экспортини тўхтатди, бу мамлакатнинг олтин захираларини кўпайтириш имконини берди. Йил бошида қазиб олинадиган ва сотиладиган олтин тўғрисидаги маълумот энди сир сақланмаслиги маълум бўлди.