Жиноят ишлари бўйича Навоий вилоят Конимех туман судининг сайёр суд мажлисида содир қилган жинояти бўйича жавобгарликдан қутулиш мақсадида ўз жонига қасд қилиб вафот этган шахсга нисбатан суд ҳукми ўқилди. Бу ҳақда «Дарё»га Жиноят ишлари бўйича Конимех туман суди раиси Фаррух Қаҳҳоров маълум қилди.
Маълум бўлишича, судланувчи Аброр (исми ўзгартирилган) Конимех туман чўлида чўпонлик билан шуғулланиб, 2017 йил 5 август куни Бухоро вилояти Ғиждувон туманида яшовчи Камолиддин (исми ўзгартирилган) ва Жалол (исми ўзгартирилган) билан оғзаки келишилган ҳолда 147 бош она қўйлар ва 120 бош барраларни ҳар ойига 800 минг сўм ойлик иш ҳақи, ҳар ойига ун, ёғ ва бошқа озиқ-овқат маҳсулотлари ҳамда йилига 12 бош қўй олиш шарти билан боқиб беришни ваъда қилади.
2018 йил 12 октябрь куни Аброр ихтиёрида бўлган майда шохли моллардан 31 бошини Баҳодирга 12 400 000 сўмга, 5 бошини Равшанга 800 000 сўмга, Давронга 13 800 000 сўмга ҳисоблаб 22 бош қўйни, Тоҳирга 3 500 000 сўмга ҳисоблаб 7 бош ва тергов давомида шахсини аниқлаб бўлмаган шахсларга сотиб юбориш орқали ўзлаштириб, 2018 йил 15 октябрь кунига қадар бўлган вақт давомида жабрланувчи Камолиддинга жами 267 бош миқдорда майда шохли молларини қайтармасдан, унга «Кармана деҳқон бозори» МЧЖнинг маълумотномасига кўра ўрта ҳисобда 147 бош она қўйлар учун жами 77 175 000 сўм ва 120 бош барра учун 37 800 000 сўм, жами 114 975 000 сўм миқдорда жуда кўп миқдорда моддий зарар этказиб, жавобгарликдан қутулиш мақсадида ўз жонига қасд қилиш орқали вафот этган.
Суд, судланувчи Аброрнинг айби, жабрланувчи аризалари, баённомалар, тилхат, маълумотномалар ва жиноят иши ҳужжатларида мавжуд бўлган бошқа инкор этиб бўлмайдиган далиллар билан тўлиқ исботини топган деб ҳисоблаб, судланувчининг қонуний вакили Зафарнинг «жабрланувчи ва унинг қариндошлари Аброрни қўрқитган бўлишлари мумкинлигини, уни ўзини-ўзи ўлдиришга мажбур қилганларини ёки Аброрни чўлда топиб олиб, уни ўлдириб, кейин осган бўлишлари мумкинлиги» ҳақидаги важлар келтиради. Суд мазкур важларни баҳолаб, Аброрни бирор киши ўлдирмаганлигини, унинг ўз жонига қасд қилганлиги ҳолати ушбу иш юзасидан ўтказилган суриштирув ва эксперт хулосасига асосан тасдиқланганлиги, ушбу иш юзасидан туман прокуратураси томонидан жиноят иши қўзғатиш рад қилинганлигини инобатга олиб, қонуний вакилнинг ушбу мазмундаги важларини оқибатсиз қолдиришни лозим топади.
Суд, судланувчига жазо тури ва миқдорини белгилашда, унинг 2018 йил 18 октябрь куни вафот этганлигини эътиборга олиб, ҳамда Жиноят процессуал кодексининг 84-моддаси 2-қисмида, биринчи қисмининг 1, 2, 3 ва 8-бандларида назарда тутилган ҳолларда, агар айбланувчи, судланувчи ёки вафот этган айбланувчининг, судланувчининг яқин қариндошлари талаб қилса, ишни юритиш умумий тартибда давом эттирилиши мумкинлиги, бундай ҳолларда ҳукм қилиш учун асослар мавжуд бўлса, айблов ҳукми жазо тайинланмасдан чиқарилиши қайд этилган.
Жиноят ишлари бўйича Конимех туман суди томонидан Қонун талабларидан келиб чиқиб, Аброрни Жиноят кодекси 167-моддаси 3-қисмининг «а» банди билан айбдор деб топиб, унга Жиноят процессуал кодексининг 463-моддаси 3-қисмининг 5-бандига асосан жазо тайинламасдан айблов ҳукми чиқаришни лозим кўрди.
Изоҳ (0)