Қашқадарё вилоятида 2019 йилнинг январь–февраль ойлари якуни бўйича ўтказилган таҳлил натижаларига кўра, ҳудудида жиноятчилик суръатининг пасайишига эришган 297 нафар профилактика инспектори ва уларга кўмаклашиб ҳамкорликда ишлаган 7 нафар фуқаролар йиғини раиси, жамоат тартибини сақлашда амалий ёрдам кўрсатган 13 нафар фуқарога 317 миллион сўм бир марталик пул мукофоти берилди. Бу ҳақда «Дарё» мухбири хабар бермоқда.
Маълум бўлишича, давлат раҳбарининг 2018 йил 24 декабрдаги қарори ҳамда Ички ишлар вазирлиги, Бош прокуратура ҳамда Молия вазирлигининг 2019 йил 15 февралдаги қўшма қарорига асосан жорий йилнинг январь, февраль ойларида нафақат Қашқадарёда, балки бутун республика ҳудудида жиноятчилик ва ҳуқуқбузарликларнинг аҳволи таҳлил қилинган.
Мазкур таҳлил натижаларига кўра Қашқадарёда 297 нафар ИИБ ходими, 7 нафар фуқаролар йиғини раиси ва 13 нафар фаол фуқаро жами — 317 нафар кишининг ҳар бирига 1 миллион сўмдан пул мукофоти берилган.
«Вилоят миқёсида ўрганилган натижалар таҳлилига кўра, 297 нафар киши ушбу мукофотга лойиқ деб топилди», — дейилади вилоят ИИБ матбуот хизмати хабарида. Бошқарма матбуот хизматининг қўшимча қилишича, 1 миллион сўм пул мукофотига муносиб кўрилган ходимлар ҳудудида жиноятчилик даражаси пасайган.
Изоҳ (0)