Жиззах вилояти тарихи ва маданияти давлат музейи марказдан олис қишлоқларда кўчма кўргазмалар ташкил этмоқда. Бу ҳақда ЎзА хабар берди.
Жиззах вилояти Фориш туманидаги 1-умумтаълим мактабида музейнинг тарих, маданият ва санъат бўлимлари кўчма кўргазмаси ташкил этилди. Кўчма кўргазмада ҳудуддаги 22 ва 55-мактаб ўқувчилари ҳам иштирок этди.
Қирқ йилдан зиёдроқ фаолият кўрсатиб келаётган вилоят тарихи ва маданияти музейида бугунги кунда 22 минг 700 тадан кўпроқ экспонат сақланмоқда. Бу экспонатларнинг катта қисмини мамлакат қадим ўтмишидан гувоҳлик берувчи археологик, этнографик ашёлар ташкил этади.
Айниқса, халқнинг миллий озодлик ҳаракатига бағишланган экспонатлар ва ҳужжатларга музейда кенг ўрин берилган. Жумладан, 1916 йилги Жиззах қўзғолонига бағишланган кўргазма шу жиҳати билан алоҳида ўрин тутади. Бу мавзуда экспонатларда қўзғолоннинг келиб чиқиш сабабларини, манзараларини акс эттирувчи тарихий ашёлар, суратлар, ушбу миллий инсонлар тақдирини акс эттирилган.
– Ёшларимизнинг Ватан тарихи ва маданияти ҳақида билимларини бойитишда мақсадида вилоятимизнинг барча ҳудудларида кўчма кўргазмалар ташкил этишни режалаштирганмиз, – дейди музей илмий ходими Мунира Юсупова. – Кўчма кўргазмада ўқувчиларга вилоятимизда учрайдиган ноёб ҳайвонлар ва ўсимликлар, вилоятимиз тарихи, этнографияси, миллий-маданий мерос объектлари ҳақида батафсил маълумот олишмоқда. Кўргазма давомида музей экспонатларни намойиш этиш билангина чекламасдан ўқувчилар билан тарихий, этнографик, экологик мавзуларда суҳбатлар ўтказилмоқда, қизиқарли видеороликлар намойиш этилаётир.
Музей жамоасининг йиллик иш режаси асосида бундай кўчма кўргазмалар барча туманларда ўтказилади.
Изоҳ (0)