Бугун, 7 март куни Миллий олимпия қўмитасида Ўзбекистон триатлон федерациясининг навбатдан ташқари ҳисобот-сайлов конференцияси ўтказилиб, унда федерация раислигига Отабек Умаров сайланди, деб хабар беради қўмита матбуот хизмати.
Таъкидланишича, тадбирда дастлаб Ўзбекистон триатлон федерацияси томонидан амалга оширилган ишлар юзасидан мудофаага кўмаклашувчи «Ватанпарвар» амалий спорт турлари маркази директори Шавкат Исматуллаев ҳисобот берган.
Сўнг кун тартибидан ўрин олган энг асосий масала федерация раиси ва унга биринчи ўринбосар сайлаш жараёнига ўтилган. Ўзбекистон триатлон федерацияси раиси лавозимга Отабек Умаров номзоди илгари сурилган ва конференция иштирокчилари бир овоздан кўрсатилган номзодни қўллаб-қувватлаши натижасида у Ўзбекистон триатлон федерацияси раиси лавозимига сайланган.
Умаровнинг биринчи ўринбосари лавозимига собиқ спортчи, триатлон бўйича кўплаб халқаро мусобақалар иштирокчиси, ҳозирда тадбиркорлик фаолиятини олиб бораётган Фарруҳ Носиров номзоди илгари сурилган. Конференция иштирокчилари уни ҳам бир овоздан қўллаб қувватлаши натижасида Носиров Отабек Умаровнинг биринчи ўринбосари лавозимига сайланган.
Триатлон — бу спортча уч кураш бўлиб, сузиш, велопойга ва югуришни ўзида бирлаштирган. МОҚнинг қайд этишича, Ўзбекистонда «ушбу спорт фаолияти деярли тўхтаб, триатлон тараққиёти ривожланмай қолганди». Энди эса федерациянинг янги раҳбарияти нафақат Токио—2020 Олимпиадаси йўлланмсини қўлга киритиш, балки унда совриндор бўлиш ҳақида ҳам ўйламоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)