Ўзбекистон Республикаси Президентининг «Хорижда истиқомат қилаётган ватандошлар билан ҳамкорлик соҳасида Ўзбекистон Республикаси давлат сиёсатини янада такомиллаштириш чора-тадбирлари тўғрисида»ги қарори ижросида доирасида мамлакатнинг туризм салоҳиятини тарғиб қилиш йўналишида Туризмни ривожлантириш давлат қўмитаси ва хориждаги ватандошлар ўртасида ҳамкорлик йўлга қўйилган эди, деб хабар беради Туризмни ривожлантириш давлат қўмитаси матбуот хизмати.
Қўмита вакиллари ҳамда Малайзиядаги бир гуруҳ ватандошлар ўртасида Малайзиянинг бир нечта шаҳарларида тарғибот ишларини ташкил этишга келишиб олинган эди. Бугун эса Куала - Лумпур шаҳрида биринчи тарғибот ишларига старт берилди. Тарғибот ишлари давомида автомашиналарга ёрлиқлар ёпиштирилди ва Ўзбекистон туризм салоҳияти ҳақида маълумот берадиган материаллар тарқатилди.
«Мен Малайзияда маркетинг йўналишида ўз фаолиятимни олиб бораман. Юртимиз туризм соҳасидаги ислоҳотларга бефарқ бўлмасдан шу ерда туруб ҳам ўз ҳиссамни қўшиш ниятида эдим. Қўмита вакиллари томонидан Ўзбекистоннинг туризм салоҳиятини биз орқали тарғиб қилиш бўйича таклиф билдирилгандан сўнг ўз имкониятларимизни ўрганиб чиқдик ва автомашиналаримизга ёрлиқларини жойлаштириш ҳамда тарғибот воситаларини тарқатишга келишиб олдик. Қўмита вакиллари биз сўраган тарғибот материалларини ўз вақтида етказиб беришди ва биз тарғиботни бошладик. Шу орқали юртимизга фойдамиз тегса хурсанд бўламиз», – дейди марткетолог Исломбек Ибрагимов.
«Шунингдек, хорижда истиқомат қилаётган ватандошлар диққатига: агарда сизда ҳам Ўзбекистоннинг туризм брендини тарғиб қилиш юзасидан ташаббус ва таклифлар бўлса, Туризмни ривожлантириш давлат қўмитаси Жамоат ташкилотлари ва чет элдаги диаспоралар билан ишлаш бошқармасига қуйидаги электрон почта орқали хабар беришингиз мумкинлигини маълум қиламиз», — дейилади қўмита хабарида.
Изоҳ (0)