Мактабгача таълим вазирлиги Олий суд билан ҳамкорликда инсофсиз мудирларга қарши курашмоқда

2018 йилнинг октябрь ойида Жиззах вилояти Шароф Рашидов туманидаги жисмоний ёки руҳий ривожланишида нуқсони бўлган болалар учун 9-сонли ихтисослаштирилган мактабгача таълим муассасасида режали аудиторлик текшируви ўтказилди. Бу ҳақда «Дарё»га Мактабгача таълим вазирлиги матбуот хизмати хабар берди.

Хабарда айтилишича, ушбу муассаса мудири Д.Ю. аудит текшируви натижаларини кутмаган ҳолда ўз хоҳишига кўра ишдан бўшаган. Текширув давомида Мактабгача таълим вазирлиги аудиторлари томонидан 708 миллион сўм миқдорида ўғирлик ва ноқонуний сарф-харажатлар ҳолатлари, шу жумладан:

• амалда ишламайдиган 19 нафар ходимга 592 миллион сўмдан ортиқ миқдорда иш ҳақи тўлаш;
• 17,4 миллион сўм миқдорида нақд пул маблағларини ноқонуний ҳисобдан чиқариш;
• 4 миллион сўмдан ортиқ суммага озиқ-овқат маҳсулотлари камомади;
• 93,9 миллион сўмлик гўшт ва сут маҳсулотларини асоссиз ҳисобдан чиқариш ҳолатлари аниқланган.

Шу билан бирга 2018 йилнинг 22-октябрида Жиззах вилояти Касаба уюшмаси кенгаши Д. Ю. ни 9-сонли ихтисослаштирилган мактабгача таълим муассасаси мудири лавозимига қайта тиклаш юзасидан судга даъво билан мурожаат этган. 18 декабрда даъво қаноатлантирилиб, суд томонидан муассаса мудирига мажбурий прогул учун 3,3 миллион сўм ва моддий зарар учун 600 минг сўм тўлаб берилиши ҳақида қарор қабул қилинган.

2019 йилнинг 14 январида Жиззах вилояти Мактабгача таълим муассасалари бошқармаси томонидан ушбу суд қарорини бекор қилиш юзасидан кассация шикояти тақдим этилган. 2019 йилнинг 22 январида 9-сонли ихтисослаштирилган мактабгача таълим муассасаси мудирини лавозимига қайта тиклаш ва унга 3,9 миллион сўм тўлаш тўғрисидаги қарор бекор қилинган.

«Афсуски, лавозимни суд орқали қайта тиклаш кенг тарқалган амалиёт ҳисобланади. Ўз хоҳишига кўра ёки тегишли модда бўйича ишдан бўшатилган мудирлар судда босим остида ишдан бўшаганини таъкидлаб, аввалги мансабини қайтаришга ҳаракат қиладилар. Биринчидан, бундай аризалар Мактабгача таълим вазирлигига нисбатан туҳматдир. Иккинчидан, биз ўғирлик, коррупцияга оид фирибгарликлар ва бошқа қоидабузарликлар билан болалар ҳаёти ва саломатлигини хавф остига қўяётган шахслар мактабгача таълим тизимига қайтишига йўл қўя олмаймиз», — дейди Мактабгача таълим вазирлиги юридик бошқармаси бошлиғи Умида Усмонова.