Канадада ёмон об-ҳаво сабаб самолёт 8 соат давомида уча олмади, учувчи йўловчилар учун 23 та пицца буюртма берди

Канадада оралиқ манзилда учишга узоқ вақт рухсат ололмаган учувчи йўловчилар учун 23 та пицца буюртма қилди. Бу ҳақда TJournal хабар берди.

Хабарда айтилишича, 4 март куни самолёт Торонтодан Голифаксга (Янги Шотландия) учган. Ёмон об-ҳаво туфайли Фредеректонда тўхташга мажбур бўлган.

Учувчилар йўловчиларга пишлоқли пепперони пицца буюртирганидан сўнг, улар самолётда «бир неча соат» вақт ўтказган. Ресторан менежерининг айтишича, йўловчилар ноодатий буюртма сабаб «туни бўйи кулиб чиққан». Таом бир соат ичида келтирилган.

Йўловчилардан бирининг айтишича, улар бортда пицца келишидан аввал саккиз соат ўтирган. Кутиш «танг» ҳолатни юзага келтирган бўлса ҳам, пицца келгач, ҳамманинг кайфияти кўтарилиб кетган. Стюардессалар йўловчиларга пицца тарқатган.

«Учувчи пицца буюртмаси бутун экипажнинг меҳнати эканини ҳамма билиб қўйишини хоҳлаган. Бортда Air Canada Jazz’дан икки учувчи бор эди. Улар ҳам пицца улашишга ёрдам берган», — дейди йўловчилардан бири.

Билл Карстен исмли бошқа йўловчи эса пицца буюртирган учувчи Голифаксга учишдан олдин самолётнинг ичида юриб, ҳамма нарса жойида эканлигига ишонч ҳосил қилганини айтган. Парвоз давомида ҳам у йўловчилар билан доимий мулоқотда бўлган.