Қирғизистон телеканалларидан бирининг журналисти Бегимай Жанибекова ўзининг Facebook’даги саҳифасида Саудия Арабистонидаги Camel Fest этнофестивалига келган ватандошларининг маданиятсиз хатти-ҳаракатидан шикоят қилди. Бу ҳақда «Tengrinews» хабар берди.
Қиз уларнинг ўзини тутишини жирканч деб таърифлаган ва бир неча йигитлар стол атрофида деярли эркин кўринишда ўтиргани тасвирланган суратни илова қилган.
Унинг айтишича, йигитлар ўзларини жуда маданиятсиз тутиб, фестиваль ташкилотчилари томонидан ташкиллаштирилган швед столидаги овқатларга очофатларча ташланган, бир неча қути ичимликларни ўзларининг хоналарига олиб чиқиб кетган ва оқибатда бошқа одамлар деярли оч қолган. Айримлари вақтлироқ келган ва стол ёзилмаган бўлса бақириб, ҳуштак чалиб тезроқ бўлишларини талаб қилган.
«Араблар буларнинг барчасини фото ва видеога олишларини ҳисобга олишлари керак. Улар, эҳтимол, қирғизлар ўзини бундай тутишидан ҳайратда бўлса керак», — деган у.
Бегимай Жанибекованинг чоп этган бу постдан кейин бош режиссёр Алтинбек Максутов Қирғизистон делегацияси билан тарбиявий ва тушунтириш ишлари олиб борган.
Хабарда қайд этилишича, 9—19 март кунлари ар-Риёдда ўтказиладиган этнофестивалда минглаб қирғизистонликлар иштирок этади. Республика доирасида танлаб олинган иштирокчилар қирғиз маданияти, урф-одатларини намойиш этади, миллий спорт ва халқ оғзаки ижоди ҳақида гапириб беради ва анъанавий ҳунармандчиликни намойиш этади.
Бунда турар жой, озиқ-овқат, юклар ва ҳайвонларни ташиш ва иштирокчиларнинг фестивалга ташриф буюриши билан боғлиқ барча харажатлар Саудия Арабистонидан бўлган ташкилотчилар томонидан қопланган.
Изоҳ (0)