«Дарё» тугаётган ҳафтанинг энг муҳим янгиликларини эсга олиб ўтади.
Ҳафта бошида юрдошлар янги юз минг сўмлик купюрани ишлата бошлади. Сўнгги йиллардаги анъанага кўра, янги купюра билан суратга тушиб, ижтимоий тармоқларга жойлаш кенг тарқалди. Фалакиётшунос олим Мирзо Улуғбек ва унинг расадхонаси тасвири туширилган купюра сарғиш-оч жигарранг тусдадир.
* * *
Сўнгги ойларда жамоатчиликнинг қизғин муҳокамасида бўлган сериал машмашаси ўтаётган ҳафтада ҳам тингани йўқ. Ўзбекистон Хотин-қизлар қўмитаси раиси ўринбосари Мукаррам Нурматова муносабат билдириб, сериаллардан қўрқмасликка чақирди ва «Бутун дунёда сериаллар намойиш қилинади. Аввало, биз фарзандларимизни воқеликка мустақил, объектив, танқидий ва таҳлилий муносабатда бўлиб, ҳар қандай вазиятда тўғри хулоса чиқара оладиган қилиб тарбиялашимиз керак...», «...Кимнинг ўз фикри бўлмаса, бошқанинг фикрига эргашиб кетаверади. Дунёқараши тор, ўз фикри йўқ инсонни бошқариш осон...», «...Назаримда, миллий сериалларни кўпроқ яратиш, телеканалларда намойиш этиш зарур. Афсуски, ҳозирги миллий сериалларни мақтаб бўлмайди. Кўпроқ маиший масалалар атрофида бўлгани етмагандек, панд-насиҳатга кўп урғу берилган. Ёшларни руҳлантириб, уларга мотивация берадиган, олға интилишга ундайдиган сериаллар деярли йўқ...», деди.
* * *
26 февраль куни соат 10:30 ларда Андижон шаҳар тиббиёт бирлашмасига қарашли марказий поликлиникасининг иситиш қозонхонасида қозон портлади. Натижада воқеа жойи яқинидаги 4-сонли умумтаълим мактабининг ўқувчилари жабрланди, уларга тиббий ёрдам кўрсатилди. Уларнинг саломатлиги қониқарли ҳолда.
* * *
Ўзбекистонда январь ойида олтин-валюта захиралари 206 миллион долларга кўпайгани хабар қилинмоқда. Мамлакатнинг соф олтин-валюта захиралари ҳажми 1 февраль ҳолатига 26,6 миллиард долларни ташкил этди. Шунингдек, яқин беш йилда олтин захираларининг ўсиши 474 тоннани (18,75 миллиард долларга тенг) ташкил этиши мумкин.
Эслатиб ўтамиз, яқин йилларгача мамлакат олтин захираси ҳақидаги маълумот давлат сири тоифасига киритилиб, жамоатчиликка ошкор қилинмасди.
* * *
Актриса Ҳалима Иброҳимова ва яқинда ташкил этилган «Браво» жамоасининг лицензияси тугатилди. Бунга сабаб уларнинг ижодидаги камчиликлар, фаҳшни тарғиб этувчи сўзлар ва ахлоқсиз ҳажвиялардир. Айтилишича, бир неча кундан буён ижтимоий тармоқларда актриса Ҳалима Ибрагимованинг сўкингани тасвирланган видеолар тарқалмоқда. Шунингдек, «Гап йўқ» триосига саёз ва бачкана ҳазиллари учун огоҳлантириш берилди.
* * *
Ўзбекистон ОТМларида март ойидан тўлов-контракт нархлари оширилши маълум бўлди. Ўтган йилдан ОТМлардаги тўлов-контрактлар миқдори энг кам иш ҳақига боғлаб қўйилган, бу эса энг кам иш ҳақи ошса, тўлов-контракт миқдори ҳам ошишини англатади. Талаба контрактини олдиндан 1 йиллик тўлаб қўйган бўлса ҳам, барибир 2-семестр учун юзага келган фарқни қўшимча тўлов қилишига тўғри келади.
* * *
Ўзбекистонда депутатлар, ҳокимлар, вазирлар ва бош вазир ўринбосарларининг маошлари миқдори ошкор қилинди. Унга кўра қонунчилик паласи депутати, сенатор, вилоят ва туман ҳокимлари, вазир ва қўмита раисларининг лавозим оклади 1,5-2 миллион сўм атрофидадир. Шунингдек, бу пулга бир қанча устамалар ва мукофот пуллари қўшилади. Барча харажатлар бюджет ҳисобидан қопланади.
* * *
Кузда Наманганда яна бир автозавод ишга тушиши маълум бўлди. Попда UzFoton бренди остида Хитойнинг ўрта сиғимдаги юк автомобиллари ва микроавтобуси ишлаб чиқарилади. Сентябрь ойидан корхона ойига 500-1000 дона автомобиль ишлаб чиқариши мумкин.
* * *
Шавкат Мирзиёев 28 февраль куни Наманган вилоятига борди ва Тўрақўрғон иссиқлик электр станциясида амалга оширилаётган ишлар билан танишди. Наманганда халқ билан мулоқотда бўлди, Тўрақўрғон туманидаги Ахсикент археологик ёдгорлик мажмуасини бориб кўрди, замонавий саноат корхонасида бўлди.
* * *
Сурхондарёлик йигит ўзини ҳокимият биноси олдида ёқиб юборганлиги видеоси тарқалди. Воқеа ўтган ҳафтада юз берган бўлиб, тадбиркор йигитнинг ёнишига кредитга олган пуллари эвазига очган кафесини Термиз тумани ҳокимлиги бузиб ташлагани сабаб бўлган. У тушунтириш сўраб бир неча марта ҳокимиятга мурожаат қилган, аммо ҳоким қабулига киролмаган. Шу боис норозилик тариқасида ҳокимлик биноси олдида ўзига ўт қўйган.
Эслатиб ўтамиз, ноҳақликка норозилик тариқаси ўзига ўт қўйиш ҳодисаси янгилик эмас. 2010 йилда маҳаллий ҳокимият адолатсизлигига учраган тунислик тадбиркор Муҳаммад Буазизий шаҳар мерияси олдида ўзини ёқиб юборган.
* * *
Ички ишлар соҳасида вазни меъёрдан ортиқча хизматчилар бўлишига йўл қўйилмайди. Бу масалага президент Шавкат Мирзиёев шахсан эътибор қаратиб, «Бизга ортиқча вазнга эга зобит, ички ишлар ходими керак эмас. Бу ҳолатда қандай қилиб жиноятчини тутади? Спорт билан шуғуллансин. Бу менга эмас, ўзларига фойда. Муддат берамиз: уч ойми, олти ойми, шу вақт ичида ўзини ўнглаб, меъёрдаги вазнга тушсин», деди.
* * *
Шунингдек ўтиб бораётган ҳафтада юз берган сезиларли янгиликлар сирасига Сенат раиси Ниғматилла Йўлдошевнинг мактаб дарсликларини танқид қилгани, ёзувчи Мамадали Маҳмудовнинг (Эврил Турон) пойтахтни Жиззахга кўчириш ҳақидаги таклифини танқид қилганларга берган жавоби, шунингдек, «Сўнгги император» ва «Эртуғрул» сериалларининг эфирдан олинишини қўшиш мумкин.
Изоҳ (0)