Фарғона вилояти Бувайда туманидаги 8-умумтаълим мактабида 250 ўринли янги ўқув биноси ва спорт зали қурилмоқда. Қурилиш ишларига 1 миллиард 900 миллион сўмдан ортиқ маблағ ажратилган.
«Дарё» мухбири ота-оналар ва ўқитувчилар мурожаати асосида мазкур мактабда журналист суриштируви ўтказган, шундан сўнг «Фарғонадаги 320 ўринли мактабда 630 ўқувчи таълим олмоқда. Улар баъзан тик туриб дарс ўтади» номли мақола эълон қилинганди.
Мақолада 1976 йилда қурилган мактаб биноси 320 ўринга мўлжалланган бўлса-да, бу ерда 630 нафар ўқувчи таҳсил олиши, спорт зали ва ошхона йўқлиги, таълим масканида ўқувчиларга жой ва билим олиш учун шароит етарли эмаслиги, мактаб биноси эса кенгайтириш ва қайта қуришга муҳтож эканлиги қайд этилган эди.
Шундан сўнг вилоят халқ таълими бошқармаси томонидан мазкур мактабни Инвестиция дастурига киритиш чоралари кўрилди. Айни пайтда бу ерда янги ўқув биноси ва спорт залини қуриш ишлари бошланди.
«Қизим шу мактабда ўқийди. Бу ерда яхши билим олиш учун шароит етарли эмасди. Ўқув жиҳозлари йўқ, хоналар тор, таъмирталаб эди. Болаларимизга жой етишмасди. Мана, янги йилдан икки қаватли ўқув биноси ва спорт зали қурилиши бошланди. Янги ўқув йилидан фарзандларимиз янги бинода таълим оладиган бўлди», – дейди мактаб ота-оналар кенгаши раиси Дониёржон Абдулазизов.
Вилоят халқ таълими бошқармасидан олинган маълумотга кўра, жорий йилда вилоятда Инвестиция дастури асосида 31 та умумтаълим мактабида қурилиш-таъмирлаш ишлари амалга оширилади. Мазкур ишлар учун 74 миллиард сўмдан ортиқ маблағ ажратилган.
Айни кунларда Инвестиция дастурига кўра, шаҳар ва туманларда 7 та янги қурилиш, 13 та реконструкция, 11 та капитал таъмирлаш ишлари бошланди. «Обод қишлоқ» дастури асосида эса 45 та умумтаълим мактабида таъмирлаш ишлари бажарилиши режалаштирилган.
Изоҳ (0)