Сенатнинг ялпи мажлиси бошланди. Унда 23 та масала кўриб чиқилади

Олий Мажлис Сенатининг ўн саккизинчи ялпи мажлиси ўз ишини бошлади. Бу ҳақда ЎзА хабар берди.

Унда сенаторлар, вазирлик ва идоралар раҳбарлари, оммавий ахборот воситалари ходимлари иштирок этмоқда.

Мажлисни Олий Мажлис Сенати раиси Ниғматилла Йўлдошев очиқ деб эълон қилди.

Мажлисда 23 та масала кўриб чиқилади. Шундан 15 таси қонунлардир. Улар орасида «Ўзбекистон Республикасининг Сайлов кодексини тасдиқлаш тўғрисида», «Фуқароларнинг репродуктив саломатлигини сақлаш тўғрисида», «Жазони ижро этиш муассасаларидан озод қилинган айрим тоифадаги шахслар устидан маъмурий назорат тўғрисида»ги янги қонунлар бор. Қолганлари айрим қонунларга ўзгартиш ва қўшимчалар киритиш ва халқаро ҳужжатларни ратификация қилиш билан боғлиқ.

Олий Мажлиснинг Инсон ҳуқуқлари бўйича вакили (омбудсман) ҳисоботи, Адлия вазирининг ахбороти, Қашқадарё вилояти ҳокимининг ҳисоботи кўриб чиқилади.

Бош вазир ва Бош вазир ўринбосарларига парламент сўровлари юборилиши кутилмоқда.

Бундан ташқари, ялпи мажлисда Президентнинг айрим фармонларини ҳамда Сенат Кенгашининг қарорларини тасдиқлаш тўғрисидаги масалалар кўриб чиқилади.