Соғлиқни сақлаш вазирлиги томонидан тиббиёт ходимларининг меҳнат ҳуқуқлари қўпол равишда бузилган ҳолатлар аниқланиб, бартараф этилмоқда, деб хабар берди вазирлик матбуот хизмати.
Жумладан, МКнинг 237-моддасига мувофиқ, ҳомиладор аёллар билан тузилган меҳнат шартномасини иш берувчининг ташаббусига кўра бекор қилиш тақиқланган бўлса ҳам, И.Иргашев номли Тошкент шаҳар 4-сон клиник шифохонаси бош шифокорининг 2019 йил 26 январдаги буйруғига асосан ушбу шифохонанинг болалар реанимация бўлими ўриндош шифокори С.О. билан тузилган меҳнат шартномаси бекор қилинган.
Ходимнинг вазирликка мурожаатини ўрганиш жараёнида С.О.нинг ҳомиладор эканлиги факти ўз тасдиғини топган. Шунга кўра, бош шифокорнинг амалдаги қонун ҳужжатларига зид равишда чиқарилган буйруғи бекор қилиниб, врач С.О. аввалги ишига тикланди ҳамда мажбурий «прогул» вақти учун ҳақ тўлаб берилиши белгиланган.
Ходимнинг меҳнат ҳуқуқларини қўпол равишда бузган бош шифокорга нисбатан интизомий жазо чораси қўллаш масаласини қонунда белгиланган тартибда ҳал этиш Тошкент шаҳар соғлиқни сақлаш бошқармаси бошлиғи зиммасига юклатилган.
Шаҳрисабз туман тиббиёт бирлашмаси бошлиғининг 2019 йил 24 январдаги буйруғига асосан туғруқхона бўлими мудири Баҳром Кучаров иш берувчининг ташаббуси билан вақтинча шошилинч тез ёрдам бўлимига шифокор вазифасига ўтказилган. Бунда иш берувчи томонидан ходимдан розилик олинмаган. Ваҳоланки, МКнинг 93-моддасига кўра, вақтинча бошқа ишга ўтказишга ходим билан иш берувчи ўртасидаги келишув бўлган тақдирдагина йўл қўйилади.
Ушбу ҳолатда хам Соғлиқни сақлаш вазирининг тегишли буйруғи билан Баҳром Кучаров аввалги ишига тикланиши таъминланиб, ходимнинг ҳуқуқлари тўлиқ тикланган.
Шаҳрисабз туман тиббиёт бирлашмаси бошлиғига нисбатан эса вазир буйруғи билан Меҳнат кодексига мувофиқ ўртача ойлик иш ҳақининг ўттиз фоизи миқдорида жарима интизомий жазо чораси қўлланилган.
Изоҳ (0)