2019 йилнинг 27 февраль куни Бирлашган миллатлар ташкилоти Тараққиёт дастури Қорақалпоғистон ўрмон хўжалиги қўмитасига Нукусда «Ўзбекистоннинг қурғоқчил ҳудудларида жойлашган фермер ва деҳқон хўжаликларининг иқлимий барқарорлигини таъминлаш» қўшма лойиҳасини амалга ошириш доирасида қишлоқ хўжалиги ускуналари ва техникасини топширди. Бу ҳақда БМТТД ахборот хизмати хабар берди.
Ускуналарнинг бир қисми Ўзбекистондаги БМТТД ва Ўзбекистон Республикаси Ўрмон хўжалиги қўмитаси ўртасида тузилган меморандумга мувофиқ харид қилинган.
Ҳужжат 2018 йилнинг май ойида имзоланган.
Меморандумга кўра, тракторлар, ҳамда олдинроқ олиб келинган дарахт ўтқазиш машиналари, юқори тупроқ қатламига ишлов берувчи плуглари, зовур қазгичлар, тупроқни чуқур юмшатгичлар ва бошқалар Орол денгизининг қуриган тубида дарахт ўтқазиш ва мелиоратив ишларини бажаришда ва яйловлар унумдорлигини сақлаш ва яхшилаш учун ишлатилади.
Адаптация жамғармасининг молиявий кўмагида амалга оширилаётган юқорида тилга олинган лойиҳанинг асосий мақсади - қурғоқчиликнинг таъсирига энг дучор бўладиганЎзбекистон ҳудудларида иқлим ўзгаришларига чидамли бўлган қишлоқ хўжалиги ва чорвачилик хўжаликларини яратишдан иборатдир. Лойиҳанинг намунавий ҳудудлари Қорақалпоғистонда жойлашган.
Лойиҳанинг кўмагида, ландшафт даражасида иқлим ўзгаришига мослашиш бўйича чора-тадбирлар сифатида Қорақалпоғистонда илк маротаба 10та яйлов кооперативлари ташкил этилди. Қишлоқ жамоаларида яйлов чорвачилигини ташкил этиш, яйловларни самарали бошқариш ва деградацияга дучор бўлган ерларни яхшилаш уларнинг асосий вазифаси ҳисобланади.
Кегейли, Тахтакўпир, Чимбой, Қонликўл ва Муйноқ туманларидаги кооперативлар фаолиятига 43455 нафар одам жалб қилинган. Кооперативларни яратиш янги иш ўринларини ва қурғоқчиликнинг юқори хатари бўлган шароитларда маҳаллий ҳамжамиятларни барқарорлигини таъминлаш мақсадида билимлар ва кўникмаларни ошириш бўйича ишларни бажариш имконини берди.
Маросим доирасида кооператив ҳамжамиятлар вакилларига ем-хашак базасини мустаҳкамлаш учун тракторлар, ўроқ, ҳашакни йиғиб олувчи машиналар, деградацияга дучор бўлган яйловларни тиклаш ва унумдорлигини ошириш мақсадида лиман усулида суғоришни таъминлаш учун сув насослари тақдим этилди.
Изоҳ (0)