Каттақўрғонда таҳқирланиб, кейинчалик ўғрилиги учун жазо тайинланган аёл Ғаллаоролда яна жиноятга қўл урди

Самарқанд вилоятининг Каттақўрғон шаҳри ИИБ собиқ катта тезкор вакили Санъат Умаров томонидан таҳқирланиб, шаҳар ИИБ биносида ечинтирилган, сўнгра Оқдарё туманида содир этган ўғриликлари учун ЖИБ Оқдарё туман суди томонидан 4 йил озодликдан чеклаш жазоси тайинланган, Каттақўрғон туманида истиқомат қилувчи Н.Т. яна жиноят устида қўлга тушди.

«Kun.uz» нашрига тақдим этилган маълумотларга кўра, Н.Т. 2019 йил 10 февраль куни эрталаб 06:00 ларда шериги О.С. билан Жиззах вилояти, Ғаллаорол туманида жойлашган «Ғаллаорол деҳқон бозори»да киссавурлик йўли билан ўғирлик қилиш мақсадида ўзаро жиноий тил бириктириб, бозорга келишади ва унинг ҳудудида жойлашган чойхонада спиртли ичимлик истеъмол қилиб, маст ҳолатда соат тахминан 08:00 ларда тирбанд жойда картошка-сабзи харид қилаётган фуқаро Л.Аҳмедованинг ҳамёнидаги 165.000 сўм ва Samsung русумли уяли телефон аппаратини киссавурлик йўли билан ўғирлаб олишади.

Бундан ташқари, шу куни соат тахминан 08:30 ларда Н.Т. ва О.С. ўзларининг жиноий ҳаракатларини давом эттириб, «Ғаллаорол деҳқон бозори»га кириш дарвозасининг олдида одамлар тирбанд жойда фуқаро С.Якубова пайпоқ сотиб олаётганлигидан фойдаланиб, унинг ҳамёнидаги 75.000 сўмни такроран киссавурлик йўли билан ўғирлаб олган чоғда ушланиб, жиноий қилмишлари фош этилган.

Н.Т. ва О.С.дан Л.Аҳмедовага тегишли бўлган Samsung русумли уяли телефон аппарати ҳамда С.Якубовага тегишли бўлган ҳамён билан 75.000 сўм пуллар ҳужжатлаштириб олинган.

2019 йил 12 февраль куни мазкур ҳолат юзасидан Н.Т. ва О.С.га нисбатан Жиноят кодексининг 169-моддаси 3-қисми «а» банди билан жиноят иши қўзғатилган.

Н.Т. ва О.С. фуқаро С.Якубованинг ҳамёнидаги 75.000 сўм миқдоридаги пулни киссавурлик йўли билан ўғирлаб олганликлари бевосита гувоҳ бўлган бозорда савдо қилувчи фуқароларнинг берган кўрсатмалари ҳамда «Ғаллаорол деҳқон бозори»га ўрнатилган, ўғирлик ҳолати туширилган видеотасвир билан тўлиқ ўз тасдиғини топган.

2019 йил 12 февраль куни Н.Т. гумонланувчи сифатида иштирок этишга жалб қилиниб, Жиноят процессуал кодекснинг 221-моддаси тартибида ушланган.

14 февраль куни ЖИБ Ғаллаорол туман судининг ажримига кўра Н.Т.га нисбатан «қамоққа олиш» тарзидаги эҳтиёт чораси қўлланилган.

21 февраль куни Н.Т. ва О.С.га нисбатан Жиноят кодексининг 169-моддаси 3-қисми «а» банди билан айб эълон қилинган ва жиноят иши ЖПКнинг 381-моддаси тартибида туман прокуратурасига юборилган.