2019 йилдан бошлаб Халқ таълими вазирлиги умумий ўрта таълим мактабларида зўравонликнинг олдини олиш мақсадида лойиҳаларни амалга оширишни бошлади. Бу ҳақда ЎзА хабар бермоқда.
Вазирлик ахборот хизмати хабарида келтирилишича, «Мактабларда зўравонликнинг олдини олиш ва ижобий психологияни ўқитиш методикаси» лойиҳаси ўтказилиши режага киритилган.
Лойиҳа мактабларда ўқувчиларнинг эмоционал ҳолатини аниқлаш ва ижобий психология методини ўқитиш орқали буллингнинг олдини олиш ва унга қаршиликни оширишга қаратилган.
Мазкур беш ойлик лойиҳани амалга оширишда АҚШлик профессор Лори Вулф иштирок этади. Профессор АҚШда ижобий психология соҳаси мутахассиси, бир қатор илмий нашрлар ва профессионал тақдимотлар муаллифи. Вулф хоним болалар ва ўқитувчилар ўртасида стрессни бошқариш, шунингдек, болаларда руҳий зўриқиш ҳолатини аниқлашга ихтисослашган эксперт. Лори Вулф АҚШнинг турли таълим муассасаларида фаолият юритган.
2019 йилнинг июль ойига қадар позитив психология методи Тошкент шаҳридаги тўртта мактабда ҳамда Нукус, Бухоро, Самарқанд ва Намангандаги Халқ таълими ходимларини қайта тайёрлаш ва уларнинг малакасини ошириш ҳудудий марказларида синовдан ўтказилади.
Асосий эътибор мамлакатдаги мактабларда руҳий тушкунликка тушган болаларни аниқлаш, шунингдек, ўқитувчи ва психологлар учун ташкил этилган тренинг ва машғулотлар орқали стрессни енгиб ўтишига кўмак беришга қаратилади. Шу билан бирга, лойиҳа ўқитувчиларга ҳам стресс ва ишдан «совиш» ҳолатларининг олдини олишда ёрдам беради.
Мазкур лойиҳа доирасида иштирокчилар имтиҳон пайтида ва ҳаётларида стрессни енгиб ўтишга қаратилган тренинг, семинар ва турли машғулотларда иштирок этадилар.
Лойиҳа муваффақиятли амалга оширилса ижобий психология методи Халқ таълими ходимларини қайта тайёрлаш ва уларнинг малакасини ошириш ҳудудий марказларининг ўқитувчилар ва психологларини ўқитиш дастурларига жорий этиш режалаштирилган.
Январь ойида Вазирлик ЮНЕСКО билан ҳамкорликда умумий ўрта мактабларда зўравонликнинг олдини олиш лойиҳасини амалга оширишни бошлади. Лойиҳа 2019-2020 йилларда амалга оширилади ва зўравонликни олдини олишга бағишланган ўқув материалларини Ўзбекистон шароитига ва қонунчилигига мослаштирилади. Лойиҳада европалик мутахассислар иштирок этиши режалаштирилган.
Шу билан бирга, ХТВ @xtvabbot ботини ишга туширган бўлиб, унинг ёрдамида зўравонлик ва агрессияга оид ота-оналар, ўқитувчи ва ўқувчилар саволларига жавоб берилмоқда.
Изоҳ (0)