Тўлов тизими брендини яратиш мақсадида Марказий банк томонидан янги ташкил этилаётган тўлов тизими учун ном танлашга танловда аҳоли ўртасида ўтказилган овоз бериш натижалари бўйича «Ҳумо» варианти 45,3 фоиз билан биринчи ўринни эгаллаганди. Марказий банк маълумотларига кўра, мазкур тўлов тизимини 2019 йил мобайнида тўлақонли фаолият юритишини таъминлаш режалаштирилмоқда, дея хабар беради Spot.
Бугунги кунда «Ҳумо» тўлов тизими учун муҳандислик инфратузилмаларини яратиш ва банк карталари, терминал қурилмалари, банкоматлар харид қилиш бўйича ишлар ҳам параллел равишда амалга оширилмоқда.
Марказий банк Ахборотлаштириш Бош маркази таркибида Миллий банклараро процессинг марказини ташкил этиш вазифаси белгиланган.
Қайд этилишича, Миллий банклараро процессинг марказининг муваффақиятли ишга туширилиши банк карталарига асосланган тўлов хизматларини кўрсатувчи чакана тўлов тизимлари ўртасида рақобат муҳитининг пайдо бўлишига, тўлов хизматларидан фойдаланувчилар учун хизматдан фойдаланганлик учун тўланадиган комиссион ҳақ арзонлашишига, илғор технологияларни қўллаган ҳолда масофавий нақд пулсиз ҳисоб-китоблар кўламини оширишга, банк карталарига асосланган чакана тўлов тизимлари сонининг ортиши билан мамлакат тўлов тизимида рўй бериши мумкин бўлган хатарларни камайтиришга хизмат қилади.
2019 йил 1 январь ҳолатига 17 686 мингта банк пластик карталари муомалада бўлиб, 2018 йил мобайнида DUET тизими банк пластик карталари билан боғлиқ лойиҳаларнинг тугатилганлиги муносабати билан умумий сони қисқарган.
Тўлов терминаллари сони эса 2019 йилнинг 1 январь ҳолатига 244 913 та, банкомат ва инфокиосклар сони эса 6 859 тани ташкил этган.
Изоҳ (0)