Тошкент давлат аграр университети ректори, академик Ботиржон Сулаймоновнинг Ўзбекистон делегацияси таркибида АҚШга ташрифи давомида Миссисипи штати университети ва Тошкент давлат аграр университети ўртасида икки томонлама ҳамкорлик тўғрисида келишув имзоланди. Бу ҳақда Тошкент давлат аграр университети матбуот хизмати маълум қилди.
Келишув Ўзбекистон қишлоқ хўжалиги учун кадрлар тайёрлаш ва уларнинг малакасини ошириш ҳамда таълим соҳасидаги ҳамкорликни кучайтириш мақсадида имзоланган.
Бунинг натижасида ўзбекистонлик талабалар Миссисипи штати университетининг турли йўналишлари бўйича амалиёт ўтказишлари, профессор-ўқитувчилар эса АҚШда малака оширишлари, шунингдек, АҚШнинг юқори малакали мутахассисларни Тошкент давлат аграр университетида ўқув жараёнига жалб этиш ва икки томонлама диплом бериш қўшма дастурларни жорий этиш йўлга қўйилади.
Шу билан бирга, Б.Сулаймонов Миссисипи штатининг Алкорн университети президенти Д.Ли ва Шимоли–Ғарбий коллеж президенти Ш.Маккей билан учрашди.
Учрашувлар давомида Тошкент давлат аграр университети Шимоли–Ғарбий коллеж ва Алкорн университетлари ўртасида талабалар ва профессор-ўқитувчилар алмашувини амалга ошириш, икки томонлама диплом бериш қўшма дастурларни жорий этиш, қишлоқ хўжалиги соҳасидаги профессор-ўқитувчиларни ТошДАУда маърузалар ўқишларини, шу жумладан вебинарларни жорий этишга келишиб олинди.
Жорий йилнинг апрель ойида Миссисипи штати университетининг раҳбарияти Ўзбекистонга ташриф буюриши режалаштирилди. Ушбу ташриф давомида Тошкент давлат аграр университети ҳамда Миссисипи штатининг Алкорн университети ва Шимолий–Ғарбий коллеж ўртасида шартнома ва йўл хариталари имзоланиши келишиб олинди.
Изоҳ (0)