«Дарё»да Қашқадарё вилоят халқ таълими бошқармасига янги бошлиқ тайинланганлиги тўғрисидаги хабар чоп этилгач, бошқарманинг собиқ бошлиғи Лазиз Холов «Дарё» мухбирига қўнғироқ қилиб, хабарга эътироз билдирди.
Лазиз Холов «Дарё» хабари сўнгидаги тилга олинган жумлада бошқарма бошлиғининг айни шу сабабга кўра ишдан олинганлигига шама борлигига иддао қилмоқда.
Эслатиб ўтамиз, Лазиз Холов эътироз билдираётган хабар сўнгида 2018 йил интернет сайтларида Қашқадарё вилоятидаги умумтаълим мактаблари фаолиятига доир кўплаб мақолалар чоп этилганлиги, мақолаларда умумтаълим мактабларидаги иситиш тизими, сифатсиз кўмир ва ўқувчиларнинг ўз жонига қасд қилиш ҳолатлари тилга олинганлиги айтиб ўтилганди.
Собиқ бошлиқ «Дарё» мухбирига эътироз билдириш баробарида лавозимини тарк этиш сабабини ҳам маълум қилган. Унинг айтишича, Лазиз Холовга Қашқадарё вилоят ҳокимлигидан иш таклиф этилганлиги боис, бошқарма бошлиғи халқ таълими вазири Шерзод Шерматовга эгаллаб турган лавозимини тарк этиб, бошқа ишга ўтиш нияти борлигини билдирган. Вазир Шерзод Шерматов эса талабга жавобан, бошқарма бошлиғи ўринбосари Мақсуд Панжиевга бошқарма бошлиғи вазифасини вақтинча бажарувчилик ваколатини топширган.
Бу ҳақда «Дарё» мухбири сўровига жавобан, халқ таълими Вазирлиги матбуот хизмати масъули Анвар Умаров бошқарманинг собиқ бошлиғи ҳақиқатдан ҳам вилоят ҳокимлигидан таклиф қилинган иш сабаб лавозимини тарк этиши хусусида вазирликка маълум қилганлигини тасдиқлади.
Аввалги хабаримизда шунингдек, бошқарманинг собиқ бошлиғи айни дамда вилоят ҳокимлигида котибият мудири сифатида ишини давом эттираётганини ёзгандик. Лазиз Холовнинг қўшимча қилишича, мазкур лавозимда ишлаётганига ҳам икки ой муддат бўлган. «Шу боис ҳам собиқ бошлиқ дейилганда Мақсуд Панжиев назарда тутилиши керак эди», — дейди вилоят ҳокимлиги котибият мудири Лазиз Холов.
Изоҳ (0)