Олий Мажлис Сенатининг биринчи ўринбосари Содиқ Сафоев бошчилигидаги Ўзбекистон делегацияси 10—14 февраль кунлари АҚШда бўлди. Бу ҳақда «Дарё»га Қишлоқ хўжалиги вазирлиги матбуот хизмати маълум қилди.
Делегация таркибига Инновацион ривожланиш вазири Иброҳим Абдураҳмонов, Қишлоқ хўжалиги вазирининг ўринбосари Саидкамол Хўжаев, Инвестиция ва ташқи савдо вазирининг ўринбосари Лазиз Қудратов, шунингдек, саноат бирлашмалари, университетлар ва илмий-тадқиқот институтлари вакиллари кирди.
Сафар чоғида Миссисипи штатида губернатор Фил Брайант, конгрессмен Трент Келли, шунингдек, паррандачилик, ўрмон хўжалиги ва фермерлар уюшмаси раҳбарлари билан учрашувлар ўтказилди.
Учрашув давомида Қишлоқ хўжалиги вазирлиги ҳамда Миссисипи қишлоқ хўжалиги ва савдо департаменти ўртасида протокол имзоланди. Ушбу ҳужжат қишлоқ хўжалигини ривожлантириш ва савдо-иқтисодий алоқаларни кенгайтириш бўйича ҳамкорликни назарда тутади.
Шунингдек, Қишлоқ хўжалиги вазирлиги ташаббуси билан томонлар озиқ-овқат хавфсизлиги ва қишлоқ хўжалиги маҳсулотларини сертификатлаш соҳасида тажриба алмашиш, шунингдек, балиқчилик ва паррандачиликни ривожлантириш бўйича иш режасини тайёрлаш бўйича келишувга эришди.
Изоҳ (0)