Тошкент вилоятининг Зангиота тумани Қуёшли қўрғонида жойлашган баландлиги 235 метрлик икки антенна мачта иншооти демонтаж қилинди. Бу ҳақда АКТ вазирлиги ахборот хизмати хабар берди.
2002 йилда узун ва ўрта тўлқинларда радиоэшиттиришлар тўхтатилганидан буён ушбу антенна мачта иншоотлари ишлатилмаётганди.
Улкан антенналарнинг демонтаж қилиш ишлари олдидан ҳоли огоҳлантирилиб, туман ҳокимлиги, фавқулодда вазиятлар ва ички ишлар, ёнғин хавфсизлиги бўлимлари, тез тиббий ёрдам, электр ва газ таъминоти хизмати мутахассисларини жалб этган ҳолда, барча эҳтиёт ва хавфсизлик чоралари кўрилган.
Ушбу антенналар жойлашган мазкур ҳудуд энди Мудофаа вазирлиги тасарруфига ўтказилиб, бу ерда замонавий ҳарбий шаҳарча қад кўтаради.
Қуёшли қўрғони ёнидаги катта қувватли радиостанция ўз вақтида узун тўлқинларда радиоэшиттириш сигналларини тарқатишга мослаштирилган. Ушбу радиостанция ҳудудида ўтган асрнинг 80 йиллари бошида баландлиги 235 метрлик икки мачта орасига узун тўлқинларни тарқатувчи радиоантенна тизими қурилган.
Аналог сигнал сифати нисбатан паст ва турли халақитлар таъсири юқори бўлганлиги боис, дунё миқёсида узун тўлқинларда радиоэшиттириш қисқариб бормоқда. Жумладан, Украина, Арманистон, Беларусь, Грузия, Озарбайжон, Молдавия, Қозоғистон, Қирғизистон, Тожикистонда узун тўлқинларда радиоэшиттириш тўхтатилган.
Ўзбекистонда ҳам узун ва ўрта тўлқинларда радиоэшиттиришлар 2002 йилдан тўхтатилганди.
Изоҳ (0)