Toshkent viloyatining Zangiota tumani Quyoshli qo‘rg‘onida joylashgan balandligi 235 metrlik ikki antenna machta inshooti demontaj qilindi. Bu haqda AKT vazirligi axborot xizmati xabar berdi.
2002-yilda uzun va o‘rta to‘lqinlarda radioeshittirishlar to‘xtatilganidan buyon ushbu antenna machta inshootlari ishlatilmayotgandi.
Ulkan antennalarning demontaj qilish ishlari oldidan holi ogohlantirilib, tuman hokimligi, favqulodda vaziyatlar va ichki ishlar, yong‘in xavfsizligi bo‘limlari, tez tibbiy yordam, elektr va gaz ta’minoti xizmati mutaxassislarini jalb etgan holda, barcha ehtiyot va xavfsizlik choralari ko‘rilgan.
Ushbu antennalar joylashgan mazkur hudud endi Mudofaa vazirligi tasarrufiga o‘tkazilib, bu yerda zamonaviy harbiy shaharcha qad ko‘taradi.
Quyoshli qo‘rg‘oni yonidagi katta quvvatli radiostansiya o‘z vaqtida uzun to‘lqinlarda radioeshittirish signallarini tarqatishga moslashtirilgan. Ushbu radiostansiya hududida o‘tgan asrning 80-yillari boshida balandligi 235 metrlik ikki machta orasiga uzun to‘lqinlarni tarqatuvchi radioantenna tizimi qurilgan.
Analog signal sifati nisbatan past va turli xalaqitlar ta’siri yuqori bo‘lganligi bois, dunyo miqyosida uzun to‘lqinlarda radioeshittirish qisqarib bormoqda. Jumladan, Ukraina, Armaniston, Belarus, Gruziya, Ozarbayjon, Moldaviya, Qozog‘iston, Qirg‘iziston, Tojikistonda uzun to‘lqinlarda radioeshittirish to‘xtatilgan.
O‘zbekistonda ham uzun va o‘rta to‘lqinlarda radioeshittirishlar 2002-yildan to‘xtatilgandi.
Izoh (0)