12-февраль куни Қишлоқ хўжалиги вазирлигида Қирғизистон делегацияси билан учрашув бўлиб ўтди. Бу ҳақда “Дарё”га вазирлик матбуот хизмати маълум қилди.
Учрашувда икки томонлама ҳамкорликнинг бугунги ҳолати тўғрисида фикр алмашилди. Ўзбекистон ва Қирғизистон ўртасидаги кўп томонлама ҳамкорликнинг ривожланишининг ижобий динамикаси алоҳида таъкидланди. Қирғизистон қишлоқ хўжалиги, озиқ-овқат саноати ва мелиорация вазири Нурбек Мурашев Қирғизистоннинг картошка, гўшт ва бошқа маҳсулотларини Ўзбекистон бозорига етказиб беришга қизиқиш билдирди.
Учрашув давомида муҳандислик, чорвачилик, уруғчилик каби соҳаларда қўшма лойиҳаларни амалга ошириш ҳолати муҳокама қилинди. Хусусан, Қирғизистон саноат, энергетика ва ер ости бойликлари давлат қўмитаси раисининг ўринбосари Жиргалбек Сагинбаев биргаликда ишлаб чиқарилган қишлоқ хўжалиги техникасини Россия Федерацияси бозорига етказиб беришни таклиф этди.
“Биз Ўзбекистон ва Қирғизистоннинг агросаноат соҳасини ривожлантиришда мамлакатларимизнинг рақобатбардош устунликларидан самарали фойдаланиш тарафдоримиз”, — дея таъкидлади Қишлоқ хўжалиги вазири Жамшид Хўжаев.
Учрашув якунида томонлар қўшма ишчи гуруҳ тузиш ва 2019-йилга мўлжалланган режаларни белгилаш бўйича келишувга эришди.
Изоҳ (0)