Қашқадарёда вилоят Молия бошқармаси, Марказий банк бош бошқармаси, ер-мулк кадастр давлат корхонаси ва вилоят давлат солиқ бошқармаси ҳамкорлигида Президентнинг 2018 йил 26 июндаги «Давлат солиқ хизмати органлари фаолиятини тубдан такомиллаштириш чора-тадбирлари тўғрисида»ги Қарорига асосан паспортлаштириш тадбири бошланди. Бу ҳақда «Дарё»га Қашқадарё вилояти давлат солиқ бошқармаси Жамоатчилик билан алоқалар ва ҳуқуқий ахборот шўъбаси бошлиғи Фирдавсий Жабборов маълум қилмоқда.
Тадбирнинг илк кунида Қарши шаҳридаги «Шифо нур кўз» шифохонаси Қарши филиали ғазнасида кўрсатилган хизматлар учун тўланган 14 миллион сўмдан ортиқ нақд пул маблағлари назорат касса машинасига кирим қилинмагани аниқланган. Шунингдек, «Тезкор тараққиёт плюс» масъулияти чекланган жамияти ёнидаги хонада компьютер ўйинлари ташкил этган тадбиркорнинг ҳеч қандай ҳужжатлари мавжуд эмаслиги маълум бўлган.
«Икки ойдан бери умумий овқатланиш шохобчасини ташкил этиб, фаолият кўрсатиб келаётган Ёқуб Туйғуновнинг ҳам ҳеч қандай ҳужжатлари йўқлиги, бу ерда 3 нафар ходим фаолият кўрсатаётгани аниқланди», — дейди Фирдавсий Жабборов.
Тадбирда шунингдек, «Жонибек, Жалолбек, Асилбек Ёқубов» оилавий корхонаси иш бошланига бир ҳафта бўлиб, амалда бу ерда 3 нафар ходим расман ишлаяпти деб кўрсатилган бўлса-да, фаолияти қонунийлаштирилмаган 17 нафар тикувчи фаолият юритаётганлиги аниқланган.
Қарши шаҳри Каманди кўчасида жойлашган савдо дўкони ва автомобилларга техник хизмат кўрсатиш шохобчасида эса ҳеч қандай ҳужжат мавжуд эмаслиги, боз устига савдо дўконида алкоголь маҳсулотлари ҳам сотилаётгани маълум бўлган.
Юқорида аниқланган ҳолатлар бўйича фуқароларга тўғри тушунтириш берилиб, амалдаги қонунчилик асосида фаолиятини қонунийлаштириш кераклиги уқтирилган. Фирдавсий Жабборовнинг қўшимча қилишича, бу каби тадбирлар давом этмоқда.
Изоҳ (0)