Деҳқонобод туманининг «Обод» қишлоқ аҳолиси «Обод қишлоқ» дастури сабаб аҳолига мажбурий тарзда ҳовли деворларини таъмирлаш талаби қўйилаётганидан шикоят қилмоқда.
Қашқадарё вилоятининг Деҳқонобод туманида яшовчи ободликларнинг айтишича, улар яшаётган «Обод» қишлоғи дастурга тушган. «Обод қишлоқ» давлат Дастурига кўра, қишлоқда 2018 йил март–апрель ойларидан таъмирлаш ишлари бошланган.
«Обод қишлоқ» бизга қимматга тушди. Кўча деворларимизни таъмирлаш учун 3–4 миллион сўмдан кўп маблағ сарфладим. Ўзим ҳеч қаерда ишламайман. Кўча деворимиз тоши билан турганди. «Цемент қиласан» дейишди. Ортиқча маблағим йўқ эди. Агар шу ишларни бажармасак, «уйларингни олиб қўямиз» деб қўрқитишди. «Деворларингни бузиб ташлаймиз» дейишди. Қўрққанимиздан қарзга ботсак ҳам деворларимизни цемент қилдик», — дейди Зафар Отамуродов.
Аҳоли вакилларининг айтишича, туман ҳокимлиги аҳолига ёрдам бўлсин деган ниятда арзонлаштирилган нархда цемент олиб келиб берган. «Аммо олиб келинган цемент талабга жавоб бермаслиги сабаб ҳам яна ўзимиз цемент сотиб олиб қўшимча қилдик», — дейди Одил Жумаев.
«Уйимиз ёнидаги девор тоши билан турганди, — дейди Одил Жумаев. — Туман ҳокимлигидан келганлар «деворни бузиб, қайта қуринг» дейишди. «Агар бузмасангиз, ўзимиз бузиб ташлаймиз» деди. Ўз нархида, арзонлаштирилган цемент олиб келиб берамиз дейишса хўп дебман-да. Қарз кўтариб, 590 сўмдан икки тонна цементга пул бергандим. Умуман сифатсиз цемент беришган экан. Кейин яна ўзим бозордан 500 килограмм цемент олиб келиб, аралаштириб ишлатдим. Чунки цемент умуман яроқсиз экан».
Қишлоқ аҳлининг қўшимча қилишича, ҳудудда «Обод қишлоқ» давлат Дастури бўйича иш бошланганига бир йил муддат бўлган бўлса-да, ҳалигача йўллар таъмирланмаган. Ўрнатилган 26 та кўча чироғи ҳам ёнмайди.
«Қишлоғимиз обод қишлоққа тушди деб қувонгандик, — дейди Жасур Эгамов. – Эрта қувонган эканмиз. Ҳеч қандай иш бажарилмади. Кўчамизга ўрнатилган 26 та чироқ ҳам қаққайиб туришдан нарига ўтмайди, ақалли бирортаси ёнса денг. Йўллар ҳар доимги аҳволидан ҳам баттар ҳолга келиб қолди. Фақат ўзимиз ёнимиздан харж қилиб, кўча деворларимизни эпақага келтирдик, холос. Бошқа ҳеч қандай иш бўлмади ҳисоб».
Аҳолининг маълумот беришича, қишлоқда иш бошланганига бир йил бўлган бўлса-да, тугалланган иш бир километрлик пиёдалар йўлкаси экан, холос.
«Кўзга кўринган иш пиёдалар йўлкаси ва болалар боғчаси бўлди, — дейди Зафар Отамуродов. – «Обод қишлоқ» бўйича бошқа иш қилинганини билмайман. Фақат келиб халққа дўқ қилишгани қолди. «Уйингни тортиб оламиз, бульдозер билан бузиб ташлаймиз» дейишарди».
Деҳқонобод туман ҳокимлиги масъулларининг маълумот беришича, қишлоққа «Қизилқум цемент» АЖ заводининг Қарши шаҳрида очилган қурилиш материаллари савдо дўконидан имтиёзли нархда 43 тонна цемент ва 700 дона шифер етказиб берилган. Шунингдек, қишлоқдаги мавжуд 298 та хонадоннинг 271 таси таъмирланган. Бир тонна фасад бўёқ, 250 кг «краска», бир тонна оҳак ҳам етказилган.
Аҳоли билан суҳбатлашиш учун қишлоқда бўлганимизда бирор бир жойнинг оҳак қилингани ёки бўялганини кўрмаганимиз учун ҳам туман ҳокими ўринбосари Соҳиб Самадовдан айтилган «краска», оҳак ва фасад бўёқлар қаерга кетганини сўрадик. «Ҳозир ёмғирли кунлар бўлганлиги сабабли қурилиш материаллари ҚФЙ раисига топширилган, — дейди Соҳиб Самадов. — Ёғингарчилик кунлар ўтса, «краска» ва оҳак қиламиз-да. 43 тонна цемент ва 700 дона шифер эса аҳолига имтиёзли нархда берилган».
«Мен ҳам «арзон нархда цемент олиб келиб берамиз» дейишса хурсанд бўлиб, сотиб олибман, — дейди Дилмурод Бўтаев. – Афсус бекор олибман. Сифатсиз цемент экан».
«Шахсан менга ҳеч қандай цемент ёки шифер беришмаган, — дейди Қоржов Жабборов. – Келиб «деворларингни таъмирла» дейишди. Ўз пулимга бозордан цемент олиб келиб деворларимизни таъмирладим. Қишлоғимиз «Обод қишлоқ» дастурига тушганини ҳис қилмадим. Йўллар ўша-ўша абгор ҳолда. Уйимиз деворларини ўз маблағимга қилсам. Дастурнинг нима кераги бор унда?»
Туман ҳокимлиги тақдим этган ҳужжатга кўра, қишлоқдаги 2 километр 300 метр ички йўлга қум-шағал ётқизиш кераклиги белгиланган бўлиб, режада 1 километр 400 метрга жойга қум-шағал тўкилгани қайд этилган. Қизиғи, қишлоққа кириб чиққунча бирор метр жойда шағал ётқизилганини кўрмадик.
Ўзини Нормўмин Зоиров дея таништирган пенсионер отахоннинг айтишича, у киши туман ҳокими ўринбосари Соҳиб Самадовга 800 метрлик ички йўл умуман талабга жавоб бермаслигини, агар қалин қор ёғса аҳоли техникаси шу 800 метрлик масофага умуман чиқолмай қолиши ҳақида айтиб, қишлоқ обод қилинаётганидан фойдаланиб, шу йўлга ҳам қум-шағал тўкиб беришларини сўраган.
«Иккинчи ҳокимдан (ҳоким ўринбосари назарда тутилмоқда — таҳририят изоҳи.) шу йўлга ҳам қум-шағал тўкиб беришларини сўрагандим. «Биз фақат кўриниб турадиган йўлларга қум-шағал тўкамиз» – деди. Ички йўллар панада бўлгани учун бу йўлларда ҳеч қандай иш қилишмас экан».
Яна бир ажабланарли ҳолат шуки, режага кўра қишлоқдан ўтувчи йўлнинг 7,2 километрига ҳам қум-шағал тўкиш белгиланган бўлиб, амалда 3,2 км масофага қум-шағал тўкилгани ёзилган. Бироқ кузатувларимизга кўра йўл ўша-ўша ўнқир-чўнқир ҳолатда турибди.
Маълумотларга кўра, «Обод» қишлоғида бугунги кунда 468 та хонадонда 2 305 нафар аҳоли истиоқмат қилади. «Обод қишлоқ» давлат Дастурига кўра, қишлоқ ободлигига қариб 7,2 миллиард маблағ сарфланиши кўзда тутилган.
Хизмат сафари давомида аҳоли сўзига қулоқ тутиб, туман ҳокимлиги вакилларининг «Обод қишлоқ» бўйича, фалон иш қилинди, пистон иш битирилди деган баландпарвоз гапларини ҳам эшитдик. Аммо кузатганларимиз ҳокимият вакиллари гапининг тескарисини кўрсатаётганди. Фикри ожизимизча, тумандан ташқарига ҳам худди шундай ҳисоботлар кетаяпти. Бироқ, ҳақиқий аҳвол масъуллар ўз ишини қай даражада бажарганини кўрсатиб турарди-да...
Изоҳ (0)