Jinoyat ishlari bo‘yicha Qashqadaryo viloyat sudi targ‘ibot bo‘limi boshlig‘i Jo‘shqin Yo‘ldoshevning “Daryo”ga ma’lum qilishicha, 2018-yil 8-mart kuni Kitob tumanida 18 yoshli kelinchak tomonidan sodir etilgan jinoyat ishi 2018-yil 6-sentabr kuni sudya Fozil Yusupov raisligida ko‘rib chiqilgan.
Sud ishini ko‘rib chiqish davomida aniqlanishicha, voqea 2018-yil 7-mart kunidan 8-martga o‘tar kechasi soat 00:30 da sodir bo‘lgan.
2000-yilda tug‘ilgan sudlanuvchi Munisa Nurillayeva sudda marhum turmush o‘rtog‘i 1991-yilda tug‘ilgan Mirzohid Qulmurodov uni sevmasligini, ota-onasining qistoviga ko‘ra unga uylanganini ko‘p marotaba takrorlaganini aytgan. Nurillayevaning sudda qo‘shimcha qilishicha, marhum turmush o‘rtog‘i boshqa qizni sevishini ham ko‘p marotaba takrorlagan.
Aniqlanishicha, sudlanuvchi Munisa Nurillayeva hamda marhum Mirzohid Qulmurodovning to‘yi qotillik sodir bo‘lishidan 12 kun ilgari 2018-yil 24-fevral kuni bo‘lib o‘tgan.
Voqea guvohlarining sudda aytishicha, 7-mart kuni oila a’zolari kechki ovqatni birga yeyishgach, Munisa Nurillayeva hamda turmush o‘rtog‘i Mirzohid Qulmurodov o‘zlariga tegishli xonaga kirib ketgan.
So‘ngra kechasi soat 00:30 larda kelin baqirib, hammani yordamga chaqirgan. Birinchi bo‘lib xonaga kirgan qaynotasiga o‘g‘li o‘rnidan turmayotganini aytgan.
Sudgacha bo‘lgan tergov jarayonlarida Munisa Nurillayeva turmush o‘rtog‘ini rashk tufayli o‘zi o‘ldirib qo‘yganini aytgan bo‘lsa, sudda turmush o‘rtog‘i o‘zini o‘zi sim bilan bo‘g‘ib o‘ldirganini bildirgan. Qashqadaryo viloyat sud-tibbiy ekspertiza byurosi eksperti G‘.Yakubov sud majlisida marhum o‘zini-o‘zi bo‘g‘ib o‘ldirmaganligini, chunki uning bo‘yin sohasidagi jarohati aylana shaklda emasligini, jarohat bo‘yinning old qismidan o‘rtaga qadar ekanligini, bunday holatda marhum o‘zini-o‘zi bug‘ib o‘ldirgan deb bo‘lmasligini aytgan. Shuningdek, mutaxassis Mirzohid Qulmurodovning ichki a’zolaridan zahar va uyqu dori chiqmaganligini, o‘sha kuni Mirzohid Qulmurodov uxlagan holda yoki boshqacha tarzda uyqu dori, zahardan mast holda bo‘lgan bo‘lishi mumkinligini aytgan. G‘.Yakubovga ko‘ra, inson bo‘g‘ilganda qarshilik ko‘rsatishi kerak. Ushbu holatda marhum umuman qarshilik ko‘rsatmagani aniqlangan.
Sud tergov xulosalari va guvohlarning bergan ko‘rsatmasiga asoslanib, sudlanuvchiga Jinoyat kodeksi 97-moddasi 2-qismining “v” bandi (aybdorga ayon bo‘lgan ojiz ahvoldagi shaxsni qasddan o‘ldirish) bilan JKning 85-moddasiga asosan 9 yil ozodlikdan mahrum qilish jazosi tayinlagan.
Sudda shuningdek, Munisa Nurillayevaga 2017-yil dekabr oyida qo‘shnisining telefonini o‘g‘irlagani uchun ham Jinoyat kodeksining 169-moddasi 1-qismi bilan ayb qo‘yilib, eng kam ish haqining 3 baravari — 516 720 so‘m miqdorda jarima jazosi ham tayinlangan.
Izoh (0)