Туризмни ривожлантириш давлат қўмитаси ҳамда Қашқадарё вилоят ҳокимлиги томонидан Шаҳрисабзга журналистлар ва туроператорлар учун «Инфо-тур» ташкил этилди. Бу ҳақда «Дарё»га журналист Манзура Бекжонова маълум қилди.
Унда ҳудуднинг туристик салоҳиятини юксалтириш, уни фестиваллар шаҳрига айлантириш борасида амалга оширилаётган ишлар ҳақида кенг маълумот берилди.
Туризмни ривожлантириш Давлат қўмитаси Қашқадарё вилояти ҳудудий бошқармаси бошлиғи Отабек Олимжоновнинг маълум қилишича, кейинги вақтда ҳудудда эътироф қилишга арзигулик ишлар амалга оширилмоқда.
Мавжуд меҳмонхоналар замон талаблари асосида модернизация қилинган, ўнлаб янги меҳмонхоналар, юзга яқин меҳмон уйлари ташкил қилинган. Шаҳрисабзга қўйилган «Афросиёб» тезюрар поезди сайёҳлар қатновини қулайлаштирди.
2019—2020 йилларда соҳада қиймати 299,3 миллиард сўм (тадбиркорларнинг ўз маблағлари 206,6 миллиард сўм, банк кредити 92,7 миллиард сўм) ўзлаштириш ҳисобига 72 та лойиҳалар амалга оширилади.
Жумладан, меҳмонхоналар ташкил қилиш бўйича 148,5 миллиард сўм маблағ ҳисобига 15 та меҳмонхона, 1,8 миллиард сўм маблағ ҳисобига 40 та меҳмон уйлари, ўтов уйлар ва дам олиш уйларини ташкил этиш лойиҳалари, 72 миллиард сўм маблағ ўзлаштириш ҳисобига тўртта аҳоли дам олиш масканлари барпо этилади.Ҳудуднинг табиий қулайликлари кенг.
Мавжуд имкониятлардан фойдаланиб, экотуризм, этнотуризм, зиёрат ва экстремал туризм каби янги йўналишларини ривожлантиришга ҳисса қўшувчи лойиҳалар ишлаб чиқилмоқда.
Шаҳрисабз бу йилги фестиваллар мавсумини 20 март куни Миллий либослар фестивали билан бошлаб беради. Миллий подиум минбарида жаҳоннинг йирик фестивалларида бетакрор ижод намуналари билан қатнашиб, юксак эътирофга сазовор бўлган моделер ва ҳунармандлар иштирок этади.
Шаҳардаги Амир Темур хиёбони ва «Оқ сарой» мажмуаси хиёбони миллий безаклар билан безатилиб, ҳар бир шаҳар ва туманларнинг миллий либослари, урф-одатлари, таомлари намойиш этилади.
«Инфо-тур» доирасидаги матбуот анжуманида моҳир ҳунармандлар ўз режалари ҳақида сўзлаб берди, Миллий либослар фестивалининг тарғибот ролиги намойиш этилди.
Жорий йилнинг апрель ойида Қашқадарё вилоятининг Шаҳрисабз ва Китоб туманларида халқаро миқёсда илк бор Аэронавтика фестивали бўлиб ўтади.
Биринчи Китоб-Шаҳрисабз аэронавтика халқаро фестивали шу йилнинг 26 апрель санасига мўлжалланган ва ҳар йили ўтказиб борилади.
Изоҳ (0)