Андижон вилоятида кўчмас мулк объектлари ва ер участкаларидан самарали фойдаланиш чора-тадбирлари тўғрисидаги ҳукумат қарори қабул қилинди. Бу ҳақда «Ҳуқуқий ахборот» канали маълум қилди.
Қарорга мувофиқ, Андижон вилоятидаги фойдаланилмаётган 135 та давлат кўчмас мулк объекти ҳамда умумий майдони 58,9 минг квадрат метр бўлган 20 та ер участкасидан келгусида самарали фойдаланиш назарда тутилган.
Қарорда назарда тутилган кўчмас мулк объектлари ва ер участкалари танлов ўтказилмасдан тўғридан-тўғри тадбиркорлик субъектларига инвестиция ва ижтимоий мажбуриятлар белгиланган ҳолда, уларнинг фаолият йўналишини 30 йил мобайнида сақлаш шарти билан берилади.
Давлат-хусусий шериклик асосида нодавлат боғчалар битим амал қиладиган бутун муддат давомида тарбияланувчилар умумий сонининг 25 фоизини ташкил этадиган аҳолининг ижтимоий кўмакка муҳтож қатламлари, тўлов миқдори тегишли ҳудуддаги давлат боғчалари учун белгиланган ҳажмлардан ошмайдиган шартлар асосида имтиёзли қабул қилади.
Хусусий тиббиёт муассасалари шартнома амал қиладиган муддат давомида даволанувчилар умумий сонининг 25 фоизини ташкил этадиган аҳолининг ижтимоий ҳимояга муҳтож қатламларига бепул тиббий хизматлар кўрсатади.
Нодавлат мактаблар битим амал қиладиган бутун муддат давомида ўқувчиларнинг 25 фоизи ижтимой кўмакка муҳтож қатламларини имтиёзли равишда ўқитади.
Изоҳ (0)