Жиноят ишлари бўйича Самарқанд шаҳар суди томонидан 2019 йилнинг январь ойи давомида жиноят ишлари бўйича қамоқда бўлган 7 нафар шахс суд залида ҳибсдан озод этилди. Бу ҳақда «Дарё» муҳбири Фарҳод Норбўтаев хабар бермоқда.
Шунингдек, озодликдан маҳрум қилиш жойларида жазо муддатини ўтаётган ўрнатилган тартиб-қоида талабларини бажарган ва меҳнатга ҳалол муносабатда бўлган, муассаса раҳбарияти томонидан ижобий тавсифланган 5 нафар маҳкум ўталмаган жазо муддатидан Ўзбекистон Жиноят Кодексининг 73-моддасига асосан жазони ўташдан муддатидан илгари шартли равишда озод қилинган.
— Жазо муддатини ўтаётган 10 нафар маҳкумнинг ўталмай қолган жазо муддатлари Жиноят Кодексининг 74-моддасига асосан бошқа енгилроқ турдаги жазога алмаштирилиб, қамоқдан озод қилинди, — дейди Жиноят ишлари бўйича Самарқанд шаҳар судининг раиси Жаҳонгир Ғайбуллаев. — Бундан ташқари, кўрсатилган даврда жиноят ишлари бўйича Самарқанд шаҳар суди томонидан озодликдан маҳрум қилиш билан боғлиқ бўлмаган жазоларни ўтаётган ўрнатилган тартиб-қоида талабларини бажарган ва меҳнатга ҳалол муносабатда бўлган 53 нафар маҳкум Жиноят Кодексининг 73-моддасига асосан муддатидан илгари шартли равишда озод қилинди.
Маълумот учун Ўзбекистон Жиноят Кодексининг 73-моддасида жазони ўташдан муддатидан илгари шартли озод қилиш белгиланган бўлиб, озодликдан маҳрум қилиш, интизомий қисмга жўнатиш, хизмат бўйича чеклаш, озодликни чеклаш ёки ахлоқ тузатиш ишларига ҳукм қилинган шахсларга нисбатан жазони ўташдан муддатидан илгари шартли озод қилиш қўлланилиши мумкин. Шахс ижро этилмаган қўшимча жазодан ҳам озод қилиниши мумкин.
74-моддада озодликдан маҳрум этилган, озодлиги чекланган ёки ахлоқ тузатиш ишларига ҳукм қилинган шахсларга нисбатан суд жазонинг ўталмаган қисмини енгилроқ жазо билан алмаштириши мумкинлиги белгилаб қўйилган.
Изоҳ (0)