Андижонда 50 йиллик муаммога ечим топилди

Андижон вилоятининг Избоскан билан Пахта­обод туманларини боғлаб турувчи Тентаксой дарёсининг кўп­ригини сел ювиб кетга­нига 50 йил бўлганди, дея хабар беради «Халқ сўзи Online».

50 йиллик кўприк муаммоси Президент Халқ қабулхонасига қилинган мурожаатдан сўнг ўз ечимини топган.

Кўприк қурилиши учун 5 миллиард 394 миллион сўм маблағ ажратилган. Тез кунларда икки туманни ўзаро боғлаб турувчи кўприк таъмирланиб, 50 йиллик муаммо бартараф этилади.

Халқ қабулхонаси ёрдамида Қўрғонтепа туманидаги «Best tekstil» тўқимачилик корхонаси ходимларининг 2,5 ойдан буён ололмаётган 80 миллион сўмлик маоши ундириб берилган.

Президентнинг Андижон вилоятидаги Халқ қабулхонасига 2018 йил давомида бу каби мурожаатлардан 25 минг 528 та келиб тушди.

Уларнинг 78 фоизи қаноатлантирилди. Қолган қисми ҳал этиш учун ҳудудий ташкилотларга юборилган. Аммо гуруч курмаксиз бўлмаганидек, бу масалага ҳам панжа орасидан қаровчилар йўқ эмас.

Шу боис мутасадди идораларнинг 115 нафар вакилига нисбатан чора кўриш мақсадида таклиф ва тақдимномалар чиқарилди.

Оқибатда 12 нафар мутасаддига нисбатан маъмурий, 103 нафарига эса интизомий жавобгарлик тайинланди.