3 февраль куни Андижон шаҳрида Ўзбекистон Президентининг вилоят ҳамда шаҳар-туман Халқ қабулхоналарига 16 та Cobalt русумли замонавий хизмат автомашиналари топширилди. Бу ҳақда Умиджон Мамарасулов хабар бермоқда.
Андижон вилояти ҳокими, Олий Мажлис Сенати аъзоси Шуҳратбек Абдураҳмонов, шаҳар ва туманлар Халқ қабулхоналари мудирлари, вилоят ташкилотлари раҳбарлари иштирок этган тадбирда ўтган давр мобайнида амалга оширилган ишлар таҳлил қилиниб, соҳа ходимлари учун яратилаётган шароитлар аҳоли муаммоларини ўрганиш учун чекка ҳудудларга ҳам бориш имконини бериши таъкидланди.
- Президентимизнинг жорий йил 17 январдаги «Аҳоли муаммолари билан ишлаш тизимини янада такомиллаштириш чора-тадбирлари тўғрисида»ги фармони билан зиммамизга бир қатор муҳим вазифалар юкланди, — дейди Президентнинг Андижон вилоятидаги Халқ қабулхонаси мудири Мамазоир Хўжамбердиев. — Энг асосийси, 2019 йил 1 февралдан Халқ қабулхоналари муаммоларни уйма-уй юриш орқали аниқлайди ва ҳал этади. Ходимларнинг хизмат автомобиллари билан таъминланиши эса, шубҳасиз, фаолият самарадорлигини янада оширишга, айниқса, чекка қишлоқларга бориш ва у ерда истиқомат қилаётган юртдошларимиз муаммоларини ҳал этиш имкониятини кенгайтиради.
Изоҳ (0)