Ўзбекистон Республикаси Президентининг 2017 йил 14 февралдаги «Имом Термизий халқаро илмий тадқиқот марказини ташкил этиш чора-тадбирлари тўғрисида»ги қарорига биноан шу кунларда Термиз шаҳрида Имом ат-Термизий номидаги халқаро илмий тадқиқот маркази ва кутубхона, жоме масжиди, 138 ўринли меҳмонхона ҳамда оталар чойхонаси, шунингдек, имомлар учун 5 та икки қаватли турар жойлар ва бошқа бир неча хизмат кўрсатиш иншоотларини бунёд этиш ишлари қизғин давом этмоқда. Бу ҳақда вилоят ҳокимлиги матбуот хизмати хабар бермоқда.
1 февраль куни Сурхондарё вилояти ҳокими Баҳодир Пўлатов улкан ҳажмдаги бу қурилиш, бунёдкорлик ва ободонлаштириш ишларининг бориши билан яқиндан танишди. Дастлаб мазкур қурилиш объектларининг лойиҳалари билан танишув жараёнида уни янада такомиллаштириш, барча қулайликлар яратиш бўйича тавсиялар берилди.
Мажмуа ҳудудидаги масжид биноси шарқ меъморчилигининг ноёб анъаналарини ўзида мужассам этган. Иншоотдаги битта йирик гумбаз ҳамда унга ёндош 2 та 42 метр баландликдаги минора масжидга кўркамлик ва ўзига хос салобат бахш этиб турибди. Ёпиқ бино ичида бир вақтнинг ўзида 2500 намозхон ибодат амалларини бажариши мумкин.
Танишув жараёнида ушбу масжид, Имом ат-Термизий номидаги халқаро илмий тадқиқот маркази биноси ва унинг кутубхонаси, меҳмонхона ҳамда оталар чойхонаси, шунингдек, бошқа иншоотлар қурилишини қисқа муддатларда сифатли якунлаш, зарур моддий-техник база ва инфратузилмаларини ривожлантириш, мажмуа атрофини кенгайтириш ва ободонлаштириш, замонавий тунги ёритиш тизими билан таъминлаш юзасидан мутасаддиларга тегишли кўрсатмалар берилди.
Изоҳ (0)