Миллий матбуот марказида Ўзбекистон Журналистлари ижодий уюшмаси қошидаги Журналист аёллар кенгашининг «Хотин-қизлар мурожаати: таҳлил ва муаммолар» мавзуида йиғилиши бўлиб ўтди. Бу ҳақда ЎзА хабар бермоқда.
Ўзбекистон Хотин-қизлар қўмитасининг 2018 йилда ташкил этилган ишонч телефонларига шу кунгача 12 мингдан зиёд мурожаат келиб тушган. Бундан ташқари, жойларда 150 дан ортиқ Ижтимоий мослашув маркази фаолияти йўлга қўйилган. Қўмита ва марказларга бўлаётган мурожаатларга тезкорлик билан жавоб бериш ва ечим топиш чоралари кўрилаётир.
Хўш, бугунги кунда хотин-қизлар кўпроқ қайси йўналишларда ёрдам сўраяпти?
Хотин-қизлар қўмитаси берган маълумотларга кўра, 2018 йилда биргина қўмитанинг ўзига 7 минг 200 дан ортиқ мурожаат бўлган. Уларнинг аксарияти уй-жой масаласида келиб тушган. Яъни тор, кам хонали уйларда кўп оилаларнинг истиқомат қилаётгани боис уй-жой олиш юзасидан мурожаат қилган. Шунингдек, уй-жойга эгалик ҳуқуқи, ўз уйида рўйхатда бўлмаслик каби оилавий низолар сабаб келиб чиққан муаммолар ҳам бор. Ўз ҳақ-ҳуқуқи поймол этилаётганини билса ҳам бунга кўнадиган хотин-қизлар кўпчиликни ташкил этади. Хотин-қизлар ҳуқуқини ҳимоялаш, тиклаш юзасидан кўрилаётган чораларга қарамай салбий ҳолатларни ҳали-ҳамон бартараф этиб бўлмаяпти.
Тадбир давомида оилавий ажримларга сабаб бўлаётган хотин-қизларга қатъий жазо бериш таклифи ҳам билдирилди.
Учинчи шахс аралашуви ортидан келиб чиқаётган турли муаммолар юзасидан ҳам фикрлашилди.
Изоҳ (0)