«Ўзатом» агентлигининг матбуот хизмати маълум қилишича, жорий йилнинг 31 январь куни Ўзбекистон делегацияси Вена шаҳрида Атом энергияси бўйича халқаро агентлиги (МАГАТЭ) бош директори Юкия Амано билан музокаралар ўтказди, деб ёзади ЎзА.
Унда Ўзбекистон Республикаси Фанлар академияси президенти Беҳзод Йўлдошев атом энергиясидан тинчлик мақсадида фойдаланиш, энг аввало, мамлакатда атом энергетикаси соҳаси, тиббиёт ва қатор бошқа йўналишларда ривожланиш босқичларига алоҳида тўхталиб ўтди.
Аввал маълум қилинганидек, ўтган йилнинг октябрида Ўзбекистонда биринчи атом электр станциясини қуриш лойиҳасига старт берилганидан бошлаб «Ўзатом» агентлиги томонидан ушбу йўналишда босқичма-босқич ишлар амалга оширилаётганини таъкидлаш зарур. Бу эса Ўзбекистоннинг МАГАТЭ талаблари ва тавсиялари билан бевосита боғлиқдир.
Юкия Амано МАГАТЭнинг мамлакатда атом электр станцияси қурилиши жараёнида техник ва эксперт ёрдамини кўрсатишга, радиацион ва ядровий хавфсизликни таъминлаш ва кучайтириш, шунингдек, техник ҳамкорлик доирасида лойиҳаларнинг амалга оширилишига тайёрлигини билдирди.
Мамлакатда АЭС қурилиши нафақат иқтисодий барқарорликни таъминлайди, балки таълим тизимини такомиллаштириш, ядро-муҳандислик фанлар, қурилиш саноати ва энергетика ривожланиши учун ҳам мустаҳкам замин яратади.
Учрашувда агентликнинг бош директорига исталган пайтда Ўзбекистонга расмий ташриф буюриш ҳақидаги таклиф хати топширилди.
Эслатиб ўтамиз, Тошкентда МАГАТЭ экспертлари иштирокида навбатдаги семинар ўтказилиши кутилмоқда.
Изоҳ (0)