Андижон давлат университетида 4 йўналиш бўйича қўшма дастур асосида кадрлар тайёрланади
Андижон давлат университети ректори Акрамжон Юлдашев бошчилигидаги делегация вакиллари Россия Федерациясининг Мордовия давлат университетида бўлиб қайтди. Бу ҳақда университет матбуот хизмати котиби Шарофиддин Ҳошимжонов «Дарё»га хабар бермоқда.
Ўзаро икки томонлама академик ҳамкорликни янада мустаҳкамлаш ва қўшма дастурлар асосида кадрлар тайёрлаш, талабалар алмашинувини йўлга қўйиш, профессор-ўқитувчиларни стажировка, малака ошириш, аспирантура ва докторантурага юбориш, илмий, методик ҳамкорликни ривожлантириш мақсадида ташкил этилган учрашувда Мордовия давлат университети ректори Сергей Вдовин ва олийгоҳ проректорлари қатнашди.
Ташриф мобайнида меҳмонлар университетнинг илмий, таълим ва ижтимоий инфратузилмаси билан танишиш асносида математика ва ахборот технологиялари, иқтисодиёт, биотехнология ва биология факультетлари, Физика ва кимё, Тиббиёт, Миллий маданият институтлари, спорт-соғломлаштириш мажмуаси, волонтёрлар маркази ҳамда «Силикон карбидли ягона кристалларни синтез қилиш ва қайта ишлаш» илмий-тадқиқот лабораторияси фаолияти билан ҳам яқиндан танишди.
Икки кунлик ташриф якунида университетлар ўртасида қўшма таълим дастурлари тўғрисида битим имзоланди. Унга кўра 2019–2020-ўқув йилидан бошлаб, «Филология» (рус тили ва адабиёти) ҳамда «Туризм таълим» йўналишлари бўйича бакалавриатурага, «Биология» ва «Менежмент» мутахассисликлари бўйича магистратурага қўшма таълим дастурлари асосида абитуриентлар қабул қилишни бошлаш ҳамда академик ҳаракатланишни янада ривожлантириш кўзда тутилган.
Маълумот ўрнида айтиш лозимки, Мордовия давлат университети билан ҳамкорлик алоқалари 2018 йилнинг 18–19 октябрь кунлари Тошкент шаҳрида ўтказилган «Ўзбекистон-Россия таълим форуми»даги келишувлар натижасида иккала олий таълим муассасалари ўртасида имзоланган ҳамкорлик меморандуми доирасида амалга оширилмоқда.
