Марказий банк 2019 йилда инфляция даражаси ортишининг асосий хатарларини қайд этди

31 январь куни бўлиб ўтган брифингда Марказий банк 2019 йилда инфляция жадаллашувининг асосий хатарларини қайд этди, деб хабар беради Spot.

Таъкидланишича, асосий хатарлар қуйидагилар билан боғлиқ:

• юқори инфляция кутилмаларининг сақланиб қолиниши;
• ҚҚС тўлашнинг янги механизми жорий этилиши муносабати билан айрим тоифадаги товарлар ва хизматлар нархларининг ошиши;
• энергия ресурслари нархларининг ошиши натижасида иккиламчи таъсир кўламининг кенгайтирилиши.

Қайд этилишича, 2018 йил сентябрь ойида қайта молиялаш ставкасининг ўсиши кредитлаш шароитларининг кескинлашувига олиб келди, натижада кредитлашнинг ўсиш суръатлари нормаллашди.

«Ноябрда энергия ресурслари учун тартибга солинган нархларнинг кўтарилишидан иккинчи даражали таъсир кўлами прогноз қилинганидан анча паст бўлди. Бу 2019 йилда ишлаб чиқариш харажатларининг ошиши сабабли кечиктирилган инфляциянинг кучайишига олиб келиши мумкин», — дея Марказий банкда таъкидланди.

Ташқи иқтисодий шароитлар тўртинчи чоракда барқарорлашди ва ички вазиятга жиддий босим ўтказмади. Бундан ташқари, валюта курсининг ўзгарувчанлиги 2018 йилнинг олдинги чоракларида ташқи шароитлар ёмонлашувининг таъсирини юмшатишга имкон берди.

Умуман олганда, Марказий банк 2019 йилга мўлжалланган асосий инфляция прогнозини 13,5 — 15,5% даражасида сақлаб қолди. Прогнозларга кўра, йиллик инфляция февраль март ойларида энг юқори поғонага кўтарилганидан сўнг секинлашади, аммо июнь ойида электр энергияси ва табиий газ учун тарифларнинг режалаштирилган ўсиши унинг пасайишини тўхтатади.