Андижонда 2018 йилда 600 дан ортиқ ташкилотларда 120 мингга яқин қонунбузилишлар аниқланган
Андижон давлат университетида вилоят адлия бошқармасининг 2018 йил якунларига бағишланган Ҳайъат мажлиси бўлиб ўтди. Бу ҳақда бошқарма ҳуқуқий тарғибот ва маърифат бўлимига асосланиб журналист Умиджон Мамарасулов хабар бермоқда.
Ҳуқуқий тарғибот ва маърифат бўлими мудири Камолиддин Жалолиддиновнинг маълум қилишича, бошқарма бошлиғи Абдумутал Дадажонов олиб борган мажлисда бошқарма марказий аппарати таркибий бўлинмалари, шаҳар ва туман адлия бўлимлари раҳбар ва ходимлари, давлат нотариал идоралари нотариуслари иштирок этди.
Танқидий руҳда ўтган ҳайъат мажлисида ўтган йилда адлия органлари ва муассасалари томонидан амалга оширилгани ишлар таҳлил этилди.
Хусусан, норма ижодкорлиги ва ҳуқуқни қўллаш амалиёти соҳасида вилоятдаги маҳаллий давлат ҳокимияти органларининг 39 та қарор лойиҳалари ҳуқуқий экспертизадан ўтказилиб, шундан 34 таси давлат ҳисобига олинган.
Йил давомида жисмоний ва юридик шахслардан жами 2 минг 499 та мурожаат қабул қилинган бўлиб, унинг 2 минг 113 таси қонуний ҳал этилган.
Шунингдек, бошқарма ва бўлимлар томонидан вилоят бўйича 600 дан ортиқ (2017 йилда 290 та) ташкилотларда ҳуқуқни қўллаш амалиёти ўрганилган бўлиб, 120 мингдан ортиқ қонунбузилишлар аниқланган. Натижада 686 та тақдимнома, судларга 1,5 миллиард сўмлик 652 та даъво аризалари, 3 минг 768 та огоҳнома, 117 та (2017 йилда 87 та) маъмурий ва 15 та жиноий таклифлар киритилган.
Қўлланилган таъсир чоралар натижасида 1,4 миллиард сўмлик 538 та даъво аризалари қаноатлантирилган. Шунингдек, 427 нафар мансабдор шахс интизомий, 127 нафари маъмурий жавобгарликка тортилган, 25 нафар мансабдор шахс билан эса тузилган меҳнат шартномалари бекор қилинган.
2018 йилда Давлат нотариал идоралари томонидан қарийб 52 миллиард сўмдан зиёд давлат божи, 933 миллион сўмлик пуллик хизмат ва 2 миллиард сўм герб йиғимлари ундирилишига эришилган.
Ҳайъат йиғилишида, шунингдек, адлия бошқармаси ва унинг тизимида соҳалар фаолиятида йўл қўйилган тизимли хато ва камчиликлар ҳам айтилиб, уларни бартараф этиш бўйича ишларга ҳам тўхталиб ўтилди. Жумладан, халқ билан тўғридан-тўғри мулоқот қилиш, фуқаролар мурожаатлари билан ишлашда ҳанузгача камчиликлар сақланиб қолаётгани, мурожаатларда келтирилган важларни етарли ўрганилмаётгани таъкидланди.
Ҳисоботда фаолиятида йўл қўйилган хато ва камчиликлар учун 22 нафар давлат нотариал идора ходимлари, 7 нафар марказий аппарат ҳамда 1 нафар адлия бўлими ходимига нисбатан интизомий чоралар қўлланилгани таъкидланди.
