Япония суверенитети «барча шимолий ҳудудлар»ни (у ерда Жанубий Курил ороллари шундай номланади) ўз ичига қамраб олади, деб ҳисобламоқда. Бу ҳақда 30 январь куни Япония парламенти қуйи палатаси музокараларида Бош вазир Синдо Абэ маълум қилган, деб хабар берди ТASS.
«Шимолий ҳудудлар — бу бизнинг суверенитет амал қиладиган ҳудуддир. Бу борадаги позициямизда ўзгаришлар йўқ», — деб таъкидлаган Абэ.
Шунингдек, унинг қўшимча қилишича, Япония ҳукуматининг изчил позицияси «барча тўрт ороллар» (Япония Хабомаи деб атайдиган Кунашир, Итуруп, Шикотан ва бир гуруҳ ороллар)нинг кимга тегишлилигини аниқлаш ва шу асосда тинчлик шартномасини имзолашдан иборат.
Москва ва Токио бир неча ўн йиллар давомида Иккинчи жаҳон уруши якунлари бўйича тинчлик шартномасини имзолаш бўйича музокара олиб бормоқда. Бу борадаги асосий тўсиқ Курил оролининг жанубий қисмига эгалик ҳуқуқини белгилаш бўлмоқда. Уруш тугагач, бутун архипелаг Собиқ иттифоқ таркибига киритилган. Бироқ Токио Япония Хабомаи деб атайдиган Итуруп, Кунашир, Шикотан ва бир нечта майда ороллар гуруҳи кимга тегишлилиги борасида баҳслашишда давом этмоқда.
Изоҳ (0)