Фарғонада Бош прокуратура ҳузуридаги МИБ ходимлари билан ҳамкорликда йўл ҳаракати қоидаларини бузганлиги учун жаримани ўз вақтида тўламаган ҳайдовчиларни аниқлаш ва уларнинг автотранспорт воситаларини жарима майдончаларига қўйиш тадбирлари бошланди. Бу ҳақда «Дарё» мухбири Азизжон Эрматов хабар бермоқда.
Фарғона вилояти ИИБ ЙҲХБ томонидан йўлларда содир бўлаётган ҳалокатларнинг энг асосий омили — белгиланган тезликни ошириб ҳаракатланишни бартараф этиш мақсадида онлайн режимда ишловчи «Автокон» тезлик ўлчаш ускунасидан мунтазам фойдаланилмоқда. 2018 йил давомида мазкур ускуна ёрдамида вилоятда 47 минг 888 та ана шу турдаги қоидабузарлик аниқланган. Шу кунгача 21 минг 399 нафар ҳайдовчи содир этган қоидабузарлиги учун белгиланган жарималарни тўлашга улгурди. Ундирилган жарималар 7 миллиард 723 миллион сўмдан кўпроқни ташкил этди.
Аммо ҳамма қоидабузар ҳайдовчилар ҳам жарималарни ўз вақтида, яъни қоидабузарлик қайд этилган вақтдан бошлаб 60 кун ичида тўлаётгани йўқ. Бу ҳолатни бартараф этиш учун яна бир «Автокон» фотовидеофиксация ускунаси қўлланилмоқда. Ушбу қурилма жаримани ўз вақтида тўламай юрган ҳайдовчиларнинг автомашиналарини онлайн тарзда аниқлаб бермоқда.
Мазкур автотранспорт воситалари Ўзбекистон Республикаси МЖтКнинг 291-моддасига асосан (Транспорт воситаларини ушлаб туриш ва кўрикдан ўтказиш асослари ва тартиби) ЙПХ инспекторлари ва МИБ ходимлари томонидан вақтинчалик жарима майдонига қўйилмоқда.
Изоҳ (0)