Қизамиқ касаллиги авж олиши оқибатида камида 25 нафар бола касалланганлиги туфайли 25 январь куни Вашингтон губернатори соғлиқни сақлаш борасида фавқулодда ҳолат эълон қилди. Бу ҳақда Forum Daily хабар берди.
Қизамиқ — жуда тез юқувчи кенг тарқалган касаллик. Уни эмлаш орқали олдини олиш мумкин, бироқ Вашингтон тиббий бўлмаган сабабларга кўра эмлашни рад этиш мумкин бўлган АҚШнинг 18 штатларидан бири. У АҚШда эмланмаган болалар сони кўп бўлган штатлардан бири ҳисобланади.
Хабарда айтилишича, эмлашни рад этишга ҳуқуқий жиҳатдан рухсат берилгани ва эмлашга қарши бўлганлар ҳаракатининг кучайиши хавфли касаллик тарқалиши даражасини кучайтирмоқда. Мутахасисларнинг айтишича, яқин ойлар ичида вазият янада ёмонлашиши мумкин.
АҚШда эмлаш жорий этилишидан аввал ҳар йили 400 дан 500 нафаргача бола касалликдан вафот этган. Яна мингга яқин болаларда хавфли оқибатларга олиб келиши мумкин бўлган бош мия шиши ривожланган.
1960 йилда эмлашнинг жорий этилиши эса бу касаллик билан оғриш даражасининг камайишига ёрдам берган. Аммо баъзи ота-оналар эмлашга қарши бўлиб, уларнинг сони сўнгги ўн йил ичида яна ошган. Хусусан, Айдахо штатида болалар боғчасидаги 25 фоиз болалар касалликка қарши эмланмаган. Улар эмлаш аутизм касаллиги билан боғлиқ бўлиши ва фарзандларининг «ўзгариши» мумкинлигидан қўрқиб, ҳамон эмлашдан бош тортмоқда. АҚШ тиббиёт фанлари эса бундай қўрқувни асоссиз деб таъкидлайди.
Вашингтон соғлиқни сақлаш департаменти маълумотларига кўра, 2017—2018 йилларда қизамиқ билан оғриган болаларнинг деярли ҳеч бири эмланмаган.
«Бундай ҳолатга ҳеч қачон йўл қўймаслик керак эди, — дейди Бэйлор тиббиёт коллежи Тропик тиббиёт бўйича миллий мактаб декани, доктор Питер Хотез. — Бу штатда эмлашга қарши бўлганларнинг кўплиги оқибатидир. Эпидемия маълум вақт тарқалишда давом этади».
Изоҳ (0)