2019 йилнинг 28 январь куни Халқаро ҳамкорлик марказида «Етакчилик бугун: аёл раҳбарлар учун янги имкониятлар» мавзусида давра суҳбати бўлиб ўтди, бу ҳақда «Дарё»га Британия Кенгашининг ахборот хизмати хабар берди.
Тадбир Британия Кенгаши дастури доирасида Олий ва ўрта махсус таълим вазирлиги билан ҳамкорликда соҳада ишлаётган аёллар ўртасида етакчилик қобилиятини қўллаб-қувватлаш ҳамда тажриба алмашиш мақсадида ташкил этилган.
Дастур Буюк Британиянинг Ўзбекистондаги элчихонаси томонидан қўллаб-қувватланди. Лойиҳа олий таълимда сифатни таъминлаш бўйича йирик қўшма дастурнинг бир қисми бўлиб, аёлларда етакчилик қобилиятини ривожлантиришни кўзда тутади.
Тадбирда Ўзбекистоннинг олий ўқув юртлари проректор, декан ва бўлим бошлиқлари иштирок этиб, улар олий ўқув юртларида аёл раҳбарларининг етакчилик фазилатларини ривожлантириш бўйича британиялик соҳа мутахассислари томонидан олиб бориладиган уч кунлик семинар-тренингида иштирок этади.
Семинарда иштирок этиш учун Ўзбекистон томонидан бизнес, санъат, нодавлат ташкилотлар, депутатлар, Хотин-қизлар қўмитаси ва «Оила» илмий-амалий марказларининг муваффақиятли раҳбар ходимлар таклиф этилган.
Дастур давомида иштирокчилар олий таълим соҳасида иш юритаётган раҳбар аёлларнинг кучли жиҳатлари, эҳтиёжлари ва интилишлари, аёл раҳбарларнинг иши мобайнида тўқнаш келадиган қийинчиликларни бартараф этишда фойдаланиладиган стратегиялар ва тактикалар муҳокама қилинади.
Изоҳ (0)