2019 йилдан Андижон вилоятининг Хонобод шаҳридаги қир-адирликларда ташқи инвестиция ҳисобига нархи 30 миллион сўмгача бўлган ихчам, қулай ва арзон замонавий уйлар қурилиши бошланади. Уйларни Хонобод шаҳрида фаолият олиб борувчи «Рус Дўстлик агросаноат» масъулияти чекланган жамияти қуриб битказади. Бу ҳақда Хонобод шаҳар ҳокимлигига таяниб, «Дарё»га журналист Умиджон Мамарасулов хабар бермоқда.
«Бугун кунда аҳолининг уй-жойга бўлган талаби кундан-кунга ортиқ бормоқда. Шуни ҳисобга олган ҳолда кейинги йилларда ҳудудларда аҳоли учун намунавий лойиҳалар асосида якка тартибдаги арзон уй-жойлар қуриш бўйича кенг кўламли ишлар амалга оширилмоқда. Бироқ қурилиш маҳсулотларининг йилдан йилга кўтарилиб бораётгани, саъй-ҳаракатларни пучга чиқармоқда. Арзон дейилаётган уйларнинг нарҳ-навоси қимматга тушмоқда. Узоқ йиллардан буён шаҳримизда фаолият олиб бораётган россиялик тадбиркор Рустамжон Усмонов ушбу лойиҳа ташаббуси билан чиқди», — дейди Хонобод шаҳри ҳокими Мусахон Мамадалиев.
Тадбиркор Рустамжон Усмоновнинг айтишича, ушбу лойиҳа натижасида нафақат аҳолининг уй-жойга бўлган талабини қондириш, балки ички ва ташқи туризмни ривожлантиришда ҳам яхшигина қўл келиши мумкин экан.
«Ўзбекистон Республикаси Президент томонидан амалга оширилаётган ислоҳотлар, биз инвесторларга яратилаётган имкониятлар барчамизни бирдек қувонтирмоқда. Ундан тўғри йўлда фойдаланиш эса ўзимизга боғлиқ, албатта. Узоқ ўйланиш ва ҳамкасбларимнинг таклифлари асосида пенопласт материалларидан Япония технологияси асосида ҳам арзон, ҳам иҳчам бўладиган уйлар қуриш ғояси вужудга келди. Бу лойиҳани Андижон вилоят ҳокими Шуҳратбек Абдураҳмоновга тақдим қилганимизда маъқуллади.
Уйлар миллийликда узоқлашмаган ҳолда гумбаз усулида қурилади. Барча хонадонлар каби ичида барча шароитлар, яъни ўз ошхонаси, ҳожатхонаси ва ётоқхонасига эга бўлади. Қурилиш учун кетадиган материалларнинг деярли 92 фоизи Ўзбекистонда ишлаб чиқарилади. Шунинг учун уларнинг ўртача нархи бугунги кунда доллар ҳисобида ўртача уч минг, ўз валютамизда эса 25-30 миллион сўмгача етиши кутилмоқда.
Лойиҳа икки босқичдан иборат. Биринчи босқичда, яъни синов тарзида туристларни жалб қилиш мақсадида 200 тадан ортиқ уйлар Хонобод адирликларида 2019 йилнинг февраль ойигача қад ростлайди ва ишга тушади. Агарда яхши натижа берадиган бўлса, иккинчи босқич ҳам амалга оширилади. Бунда уй-жойлар ҳудудларда аҳолидан тушган буюртма асосида қуриб битказилади. Лойиҳанинг барча босқичи инвестиция ҳисобига амалга оширилади», — дейди тадбиркор.
Изоҳ (0)